Ongundu yoSwapo okwa tegelelwa yi ka tale muule nkene tayi gandja omageelo nokutidha iilyo yayo, pethimbo ndyoka ongundu ya taalela olweendo lyetopokauko mokati kiitopolwa yawo yomalelo.
Ongundu otayi ka kala woo noshinakugwanithwa oshinene shokweetapamwe iilyo nokupata omwaka gwetopokauko ngoka guli pokati kaakokele naanyasha mongundu ndjoka.
Ngoka omaiyuvo gaatseyinawa omolwa oshipotha shompangu moka aanapolotika yane taya pataneke pampangu etidho lyawo mongundu tayi pangele, oshipotha shoka kwa tegelelwa shi tameke mOmpangu yoPombanda mEtine twa taalela.
Mboka yane taya pataneke etidho lyawo, Omuleli gwEwawa lyAaanyasha yoSwapo nale Elijah Ngurare, Job Amupanda, Dimbulukweni Nauyoma naGeorge Kambala.
Mboka oya pula Ompangu yoPombanda yi kuthe oonkondo etidho lyawo molwaashoka inaku longithwa uuyuki nomilandu dhomondjila pethimbo elelo lyopombanda moSwapo lye ya tidha omolwa ekuthombinga lyawo mehwahwameko lyoAffirmative Repositioning ndyoka tali thiminike epangelo opo li gandje koshigwana evi lyomalukalwa.
Nonando ongaaka ongundu tayi pangele oyi wete kutya mboka otaya ka zamo oonyala dhowala mompangu molwaashoka oya teya okondalaka yawo yopankalathano nongundu.
Omutseyinawa gwEkotampango nomunongononi gwopolotika, Nico Horn okwa popi kutya etidho ndyoka olya ningwa inaku landulwa omilandu noompango.
“Mboka yane oye na ompito ombwaanawa yokusindanapo oshipotha shoka ihe oshili oshoka kutya oshike tashi ka ningwa po konima yoshipotha shompangu,” Horn ta ti.
“Ompangu ihayi kwathele medhiminathanepo nongele ongundu oya hala yi ku tidhe nena otayi ka landula omilandu dhomondjila e ta yi kutidha.”
Horn okwa gwedha po kutya oshizemo shoka otashi ka kala oonakutidhwa ya tambuleko etidho lyawo nenge Swapo otaka tulwa ponkatu mpoka taka thiminikwa a landule omilandu dhomondjila metidho lyaamboka yane ngele oshizemo shompangu kashi li muuwanawa we.
Okwa popi kutya oshiwananwa kongundu okutala komikalo dhedhiminathanepo ihe ka kushi owala kiipotha yompangu.
Yamwe oya popi kutya oyiinekela oshizemo shoka otashi ka ningilwa ongundu tayi pangele yi kale ya kotoka uuna tayi ningi omatokolo goludhi ndoka monakuyiwa.
Ongundu yiikwaveta yoSwapo, oya popi kutya kehe ombinga oyi na oshipotha shawo .
Ongundu ndjoka tayi kalelepo oSwapo mOmpangu oya popi kutya, otayi ka sindanapo oshipotha molwaashoka oshipotha shawo oshiikwatelela kokondalaka yawo yopankalathano ndjoka ya tewa.
Ngoka ta kwatele komeho osheendo shiikwaveta shoka sha kalela po oSwapo, Dirk Conradie okwa yelitha kutya, Swapo oku na okondalaka naalumentu yane mboka ya tidhwa, okondalaka ndjoka tayi utha kutya oye na okwiihumbata ngiini.
“Ito vulu okwiihumbata nayi na owa hala wu galuke opo wiihumbate nayi natango. Otwe ya tidha pamulandu na kaye na omatompelo gokupataneka etidho lyawo.”
Conradie okwa ekelehi omapopyo giikundaneki kutya mboka yane inaya hala okushuna poompito dhawo mpoka ya kala mongundu ndjoka ta ti:”Shoka osho shi li po. Shoka osho ya hala, oya hala okushunwa mpoka ya kala.”
Nonando ongaaka, oNamibian Sun oya nothelwako kutya, uuna oonakutidhwa ya sindanapo oshipotha shoka nena otaya ikutha miilonga okuza pomahala ngoka ya kala mongundu ndjoka. Ngurare naAmupanda monena otaya longele Oshiputudhilo shoUniversiti yaNamibia na okwa hololwa kutya oya hala okukala yiitula miilonga yawo.
Mboka ya ne otaya kalelwapo kuAdvocate Vincent Maleka gwaSouth Afrika kelombwelo lyomukalelipo gwopaveta gwaNamibia Amupanda Kamanja.
Kamanja ina vula okumonika opo a tye sha omanga Maleka kwa tegelelwa a kale a thika moshilongo muule womasiku ngaka.
ELVIS MURARANGANDA
Category: