Ofamili yomunamimvo 83, Maria Lotto ngoka a kala ta dhengwa nokuningilwa omatilitho geso komonamati gwoomvula 36, oya popi kutya oya za momalimbililo konima sho opolisi ye ya tseyithile kutya omulumentu ngoka okwa tulwa miipandeko mOsoondaha.
Stefanus Nampolo, ngoka ta pangulilwa oshipotha she ehameko okwa tulwa miipandeko konima sho opolisi yaShana ya ningi oshikonga shokumu tula miipandeko.
ONamibian Sun , oshiwike sha piti oya pititha onkundana kombinga yaNampolo ngoka a dhenge yina Lotto ongulohi yomasiku 23 gaDesemba momukunda Ashuupa mOshikandjohogololo shaNiipa na okwa patululwa oshipotha shedhengo neehameko. Etulo miipandeko lyaNampolo olya kuthapo omalimbililo kuMagano Nantanga omutekulu gwaLotto, ngoka a popi kutya omausiku gwokuhakotha gayinakulu oga thika pehulilo.
“Onda nyanyukwa noonkondo molwaashoka okwa tulwa miipandeko na onda pandula opolisi yaShana ndjoka ya longo nondjungu mokukwathela kuku,” Nantanga ta ti.
Okwa popi kutya ngaashiingeyi yinakulu otakotha nawa uuvite a gamenwa molwaashoka okwa kala iha kotha konima nkene a ponokelwa nokuningilwa omatilitho geso.
Pauyelele mboka wa gandjwa kofamili, Nampolo okwa tulwa miipandeko iikando ya thika puiheyali omolwa iipotha yomadhengo. Okwa hololwa woo kutya okwa dhipaga mumwayinamati ngoka a nkapa nekatana sigo omeso oomvula ntano dha piti, na okwa mangululwa sho a pewa omboloha.
KENYA KAMBOWE
Category: