Aahingidhila yatatu mboka ya hulitha pethimbo lyomadheulo ngoka ga ningwa nodhila ompe yoCessna 425, oya tumbulwa komadhina kutya oUwe Herbert, Fritz Alpers naOle Friede.
Okadhila hoka oka zi pOkapale kaEros mOvenduka na okali ke na okukanambela pokapale kaKuutako. Herbert ngoka a li omuhingidhila omunene pOkapale kaEros hoka keli oshitopolwa shOhlthaver and List (O&L), okwa kundanwa a hingila Omupresidende Hage Geingob, Omupresidende nale Sam Nujoma oshowo aanamadhina yalwe mwakwatelwa Angelina Jolie.
Friede okwa li omuhingidhila nomugamenenipo gwiiyamakuti nomaluhwa, omanga Alpers a longela ehangano lyoAir Namibia uule woomvula 12 onga kaptaina gwodhila yoAirbus 319.
Pahapu dhomupopiliko gwoAir Namibia, Paulus Nakawa okwa popi kutya Alpers okwa wayimine ehangano momasiku 16 gaJuni mo-2003 onga kaptaina gwoA319-100.
Okwa li ta longo pehala lyachief technical pilot pethimbo a hulitha.
"Eso olye tu yeka omuhingidhila gwetu a pyokoka moomvula 40. Air Namibia oshowo oshikondo shomatukodhila moshilongo osha kanitha omuhingidhila omunyasha, omwiitulemo miilonga oshowo omuniilonga a pyokoka," Nakwa ta ti.
Ngoka ta longo pehala lyomukomeho gwoAir Namibia,
Mandi Samson, naye okwa holola oluhodhi lwe momukanda gwiikundaneki ngoka gwa pitithwa mOsoondaha.
"Omawangandjo gaAfrika oga kanitha ependafule ndyoka lya tumbalekitha Afrika oshowo Namibia. Nonando ekwatathano lyetu naye inali kala olule, okwa gwedha ongushu kehangano lyetu na okwa dhigipo oompadhi dhe omolwa iilonga iiwanawa mbyoka a longo na itayi zimo momitima dhetu."
Omunashipundi gwelelo lyaO&L Group, Sven Thieme naye okwa popi kutya: " Ndika esiku ewinayi mondjokonona ya O&L oshowo moNamibia koonono, omolwa oshiponga shoka tashi kala aluhe sha gumwa oonkalamwenyo dhetu oshowo dhaapambele yoonakus."
Pahapu dhaErickson Nengola, omukomeho gwomakonaakono giiponga yoodhila, okwa popi kutya omakonaakono oga tameke nale mehuliloshiwike.
"Oya li aahingidhila ya pyokoka. Otu na okutala ngele ka pwali uupyakadhi wopautekinika naashoka ya popi hugunina,"Nengola ta ti.
Nengola okwa popi kutya oindjina yodhila otayi tumwa koSouth Afrika opo ku talike ngele oya hulithile okulonga mombanda naantseyinawa ya za koCessna koCanada okwa tegelelwa ya wayimine omakonaakono.
"Otwa tameka nale na otashi vulika tu ninge omalolelo nena (Osoondaha). Otwa tseyithila nale oombushe yetu miilonga yaUnited States of America, mboka taya katseyithila Cessna, ngoka tashi vulika a tume aanambelewa ye nenge a tokole shoka tashi ningwa."
Nengola pamwe noshikondo she otaya ka gandja olopota kUuministeli wOmalweendo.
"Otwiinekela kutya otatu ka mona uuyelele woshiyetithi shoshiponga uuna twa lesha uuyelele awuhe wo radar recordings."
JEMIMA BEUKES