AaNamibia omayovi oya mbombolokele mOkapale kaSam Nujoma ongulohi yEtitano opo yaka mone 'omupolofeti' OmuMalawi ngoka a tseyika koyendji, Shepherd Bushiri.
Bushiri, ngoka e na aalanduli oyendji menenevi, okwa thiki mOvenduka mEtine na okwa ningi uulalelo wowina moRamatex, ongulohi tuundjoka.
Yamwe po yomAaNamibia inaya nyanyukilwa etalelepo lyaBushiri sho ya popi kutya okuli oshikengelela.
Aalanduli ye okwa lopotwa ya futu oshimaliwa shooN$1 000 opo ya ye mehala moka mwa ningilwa uulalelo omanga yamwe ya futu oshimaliwa shooN$100 000 opo ya kuutumbe poshitaafula shimwe naBushiri.
Mboka yaahena iimaliwa oya hogolola okukala pOkapale kaSam Nujoma ongulohi yEtitano.
Okuya potundi 16:00 okapale okali nale kuudha.
Gottfried Makuta, ngoka a zi koGobabis na okwa pumbwa aniwa eyaludho molwaashoka okuna uupyakadhi wopashimaliwa, okwa piti momuyelo ngoka lyopotundi 21:30, mokati komvula tayi loko.
"Onda kondja nuudhigu. Onda ila omayambeko gandje," Makuta ta ti.
Omulanduli gumwe, Ludwig Da-Dau, okwa kala momukweyo omuleeleka gwaantu mboka inaya mona mo ehala mokapale.
Da-Dau okwa li a kala puulalelo wowina mboka wa ningwa na okwa gandja oshimaliwa she shooN$1 000, shoka osho owala a li ena.
Nonando okwa holola kashona okuuva nayi molwaashoka inaku ningwa iinyengandunge, okwa popi kutya Bushiri omupolofeti gwoshili.
"Okwa tameke ta ningi ngaaka omanga a li omushona. Yemwene omupolofeti omuwanawa."
Aantu aashona oya dhigipo okapale omolwa omvula, Bushiri ngoka a tindi okupewa okandunda molwaashoka aniwa ngoka kage shi omeya ihe omayambeko, okwa thiki lyopotundi 22:00 na okwa tameke tagalikana ihe ina ninga po iinyengandunge yasha.
JEMIMA BEUKES
Category: