Omulongiskola ngoka iidhipaga mOshitopolwa shaShikoto osha etitha oohapu kutya Sem Michael Kahimba, 27, okwiidhipaga mEtiyali konima sho a dhipaga eyoka ndyoka a adha mondunda ye.
Metumwalaka lyopangodhi ndyoka a tumine omumwayinamati omanga ina idhipaga Kashimba okwa ti:"Tala, eyoka ndyoka nda dhipaga mondunda yandje kali li owala, shoka oshiningilawina sha nuninwa omwenyo gwandje. Inandi dhipaga nale eyoka lyafa mpoka. Naya tseye oshili na ino kala watila molwaashoka kape na shoka tse nangoye tatu vulu okuninga. Lalapo nawa mumwameme. Otatu ka tsakanena monkalamwenyo tayi landula. Lombwela ofamili yandje, aalongi pamwe nangame oshowo aanaskola nakehe gumwe. Ondiinekela uululume itawu kalele. Ombili molwaashoka epuko olyandje sho nda dhipaga eyoka. Onda li ndi shi oshi li mondjila ihe nani kashi li mondjila."
Opolisi inayi vula okukoleka ehokololo lyeyoka nenge etumwalaka ndyoka lya tuminwa omumwayina gwanakusa, ihe ngoka ta longo pehala lyakomanda gwOshitopolwa shaShikoto, Naomi Katjiwa, okwa popi kutya opolisi yaKatope oya patulula oshipotha shomapulaapulo.
Okwa popi kutya Kashimba, okwa li omulongiskola poskola Evale Combined School momudhingoloko gwaNamishu, na okwa adhika iimangelekela momuti nongodhi.
PLACIDO HILUKILWA