Ongundu yoRally for Democracy and Progress (RDP) oya holola omaiyuvo gawo moshiningwanima shoka sha ningwa mOkongo omasiku ga piti, moka aakwashigwana yiiyadha yaahena omagumbo, ngoka ga hanagulwa po komunangeshea omuChina molwaashoka ogeli pehala lye aniwa.
RDP otayi pula epangelo opo li ninge omakonaakono moshikumungu shoka.
Amushanga gwomauyelele moRDP, Nghiningilwandubo Kashume, okwa popi kutya kashi li mondjila komunangeshefa ngoka eende oshinano shookilometa omayovi okuya moNamibia nokupewa evi komapepe gaakwashigwana.
Elelo lyOhangwena omasiku ga piti olya popi kutya oshitopolwa shoka shevi inashi landwa po komuChina ngoka ihe okwe shi pewa omagano.
Kashume okwa popi kutya uuna taku ninga omayambulepo aakwashigwana naya pewe nokutseyithilwa omauyelele geli mondjila.
Okwa popi kutya oshiningwanima shomOkongo oshi li oshizemo shaanambelewa mboka taya longo uulingilingi na inaya gandja omauyelele kaakwashigwana.
Kashume okwa popi kutya onkalo ndjoka otayi dhimbulukitha aakwashigwana omathimbo ga piti moka ya li ya thiminikwa nokukuthwa omaliko gawo pwaahena oonkundathana nene iifuta ya sha.
“Evi olyo owala eliko mokati kaakwashigwana mOkongo, ndyoka taya vulu okulongitha nokuya kutha moluhepo uuna lya kwata nawa.”
Okwa popi kutya e yo moshilongo lyomupunguli kehe, olya pumbwa okukala ompito ombwaanawa yokuyambulapo aakwashigwana, nuuna aakwashigwana yomOkongo ya li ya simanekwa nokuyiwa nayo moonkundathana andola uupyakadhi mboka inawu holokapo.
Ehanagulepo lyomagumbo ngoka olya tamekele momasiku 30 gaDesemba,noombashu dhaakwashigwana oshowo omatungo gawo gomakuma oga hanagulwapo.
OmuChina ngoka ina tumbulwa kedhina okwa mono oshitopolwa shevi mOkongo mo-2011 na okwa tungu ehala lyoongeshefa enene. Monena ota tanununamo ongeshefa ye naamboka ya li pehala mpoka oya thiminikwa ya ze po pehala mpoka inaku ningwa oonkundathana dha sha.
Omunashipundi gwelelo lyomukunda omupe gwaKongo, Paulus Mwahanyekange, okwa popi kutya mboka ya kuthwa pehala mpoka inaya yekwa evi lyawo ihe oya tulululwa komahala gamwe ngoka taya vulu okwiithana kutya omahala gawo yene.
PLACIDO HILUKILWA