Onkalo ndjoka itayi vulu okwiidhidhimikilwa mooskola dhoka dhongeleka nUuministeli wElongo owa popi kutya hawo wu na oshinakugwanithwa shokuwapaleka ooskola dhoka.
Omukalimo gwomoNkurenkuru okwa lombwele oNamibian Sun kombinga yonkalo yomuhandjo gwoskola yaRupara Combined School na okwa pula epangelo li katuke oonkatu.
Okwa popi kutya onkalo ndjoka oya faathana nonkalo ndjoka tayi adhika moskola yaNkurenkuru Combined School.
“Owa tegelela ngiini aanona mboka ya pite nawa omakonaakono gawo ngele oye li monkalo ndjoka? Itandi popile nando omuntu gwontumba akale monkalo ya fa mpoka,” omukwashigwana ngoka ta ti. Onzo ndjoka oya popi kutya momuhandjo gwoskola ndjoka omuna aanaskola oyendji okuyeleka noombete dhoka dhili momuhandjo naashoka osha thiminike aanona ya konge omikalo dhilwe ngaashi okuninga oondhopi oombete dhawo.
Okwa popi kutya molwaashoka omiyelo odha patuluka oowili 24 mesiku, iikombo monena nayo ohayi lala momuhandjo ngoka.
Sho a ningilwa omapulaapulo, omupeha omukomeho gwelongo moKavango West, Fanuel Kapapero, okwa popi kutya oku na otseyo yonkalo ndjoka ihe uuministeli hawo wu na oshinakugwanithwa shokukandulapo omukundu ngoka molwaashoka ooskola dhoka odhoongeleka nonando ohadhi mono eyambidhidho okuza kepangelo.
Kapapero okwa popi kutya shoka oshinakugwanithwa shaasita nelelo lyoskola opo ya yambulepo onkalo yaanona.
Onzo ndjoka oya holola kutya, oya uva nayi molwaashoka uuministeli owushi onkalo ndjoka ihe kawu na shoka tawu ningipo mokukandulapo omukundu ngoka.
Onzo ndjoka oya popi kutya aaleli yoshigwana oye na ontseyo yonkalo ndjoka ihe inaya ninga po sha, na okwa gwedha po kutya ngele oye na onge nonkalamwenyo yaanona nena oya pumbwa okukatuka oonkatu.
KENYA KAMBOWE
Category: