Amushanga gwongundu yoDTA, mOshitopolwa shaShana, Hyginus Daniel-Kaya, okwa popi kutya aantu mboka yaahena omaulema gontumba nomaunkundi ihe oya tokola okulongitha ethimbo lyawo pakukala poondingosho pehala lyokulima omapya gawo oye li esithahoni koshigwana na iya pewa we oondya dhoshikukuta okuza kepangelo.
Nonando ye omukalimo gwomOshakati, okwa popi kutya pethimbo ndika ohayi komukunda omathimbo nomathimbo opo a kalime epya lye.
“Onkalo ndjoka itayi idhidhimikilwa moka aakwashigwana mboka yaahena omaunkundi ga sha komalutu na oye na omapya ihe onkene kehe omvula otaya mono oondya dhoshikukuta okuza kepangelo molwaashoka pehala lyokulonga ohaya kala owala ya kaalela oondingosho,” Daniel-Kaya ta ti.
Sho a popi noNamibian Sun okuzilila megumbo lye lyopamuthigululwakalo mOkatana, Daniel-Kaya okwa gandja omayele ge totepo lyookomitiye dhaanamapya miikandjohogololo kehe, opo dhi vule okukumika nokutsa omukumo aakwashigwana opo kaya kale owala ya tala koshipala shepangelo.
“Epangelo olya pumbwa owala okukatuka oonkatu uuna kuna oshikukuta nenge okuyambidhidha aantu moka ye na omaunkundi oshowo aakokele.”
PLACIDO HILUKILWA