Omanga yalwe omathele natango ye li mondjila okuza kiitopolwa ya yooloka, iilyo mbyoka ya thika po-405 oyiishangitha poshinyanga shoka omutenya gwOmaandaha.
Omunashipundi gwoNamvet, Jabulani Ndeunyema, okwa popi kutya iilyo mbyoka oya tameke ehololomadhilaadhilo lyawo sho ya li ya gongala lyotango momasiku 18 gaDesemba mOpuwo omvula ya piti oshowo kuyele omwedhi nguka mOvenduka. Ongundu yiilyo mbyoka ya za komahala ngaashi Aminuis, Ovitoto, Okakarara oshowo mOnooli yoshilongo oya thika nale pehala mpoka taya ka ningila ehololomadhilaadhilo lyawo.
"Aantu mbaka itaya shuna sigo kwa kandulwapo omukundu. uuna inaku kandulwapo omukundu nena iilyo yoNamvet otayi ka konga omukalo gwokuzamo moluhepo," Ndeunyema ta ti.
Okwa popi kutya shoka she ya hwahwameke, onkalo yoluhepo moshilongo oshowo etopolo lyeliko lyaathike pamwe moshilongo.
Ndenyema okwa popi kutya oyendji yomiilyo mbyoka oye li moomvula dhawo dhesilohenda onkene oya hala okudhigila oyana yawo sha omanga ina ya hulitha.
Ndeunyema okwa popi kutya nonando iilyo yawo oyindji oyi li moomvula dhuukokele, natango oya nika oshiponga.
"Otashi vulika taya monika ya kulupa ihe oya fa omayoka. Ngele owa a adha eyoka lya sa ino dhana nalyo molwaashoka omasipa galyo natango oge na uuzigo. Ngele owa gandja iilwitho kaakwiita nale natango otaya vulu okuumba," Ndeunyema ta ti.
MuFebruari gwomvula ya piti, pethimbo lyomutumnba gwiikundaneki ngoka gwa ningwa mOnooli yaNamibia, Ndeunyema okwa popi kutya oontamanana niikolokosha ya holoka miilongo ngaashi Libya naIraq oya etithwa kaakwiita mboka inaya talikako nokuyalulwa.
MOmaandaha okwa gandja natango etumwalaka ndyoka opo a yelithile Aanamibia kutya oshike hashi etitha iita.
"Itandi tilitha omuntu ihe naya kale owala ya kunkililwa."
Konima yoomvula 6 dhoonkundathana naaleli yOngundu yoSwapo, Uuministeli wIipambele yOonakulwa Aakulu oshowo aakuthimbinga yalwe, dhoka inadhi adha ethikilo lyasha, Namvet okwa holola kutya oku na einekelo kutya Omupresidende Hage Geingob otaka pulakena komakemo gawo.
"Otushi shi kutya Omupresidende Geingob oha longo kuyemwene. Otwiinekela muye sho a popi kutya, ka pe na omuNamibia taka thigalapo ihe nonando ongaaka inatu inekela oSwapo naashoka osho sha etitha tu kale twa hala sha poshitaafula," Ndeunyema ta ti.
Okwa gwedhapo kutya, Geingob omulumentu ngoka ta vulu okuninga etokolo lyahugunina monakuyiwa yiilyo nale yoSWATF/Koevoet na ota vulu woo okutokola konkalo yombili negameno lyoshilongo.
Ndeunyema okwa popi kutya iifuta yopenzela yiilyo mbyoka inayi futwa natango hayo unene manga, aakokele yamwe mboka yali iilyo nale yoSWATF/Koevoet otaya kutha ombinga mehololomadhilaadhilo ndyoka molwaashoka oya hala oopenzela yawo yi futwe.
Titus Tjijenda (74), Josua Kavitjena (79) naBenestus Hiambazapo (51) oya popi kutya openzela yawo inayi futwa naatango konyala oomvula 26 monena.
"South Afrika okwa tumu iimaliwa opo tu futwe ihe katu shi kutya oshike sha ningwa po," Tjijenda ta ti.
"Tse otwa sa ondjala, tse katu shi aantu yiita ihe oyombili. Otwa hala owala iimaliwa yetu," Kavitjena ta ti.
Ndeunyema okwa popi kutya ongundu ndjoka ya gongala poCommando Hall otayi yambidhidhwa kaakwiita nale mboka ye li monkalo ombwaanawa mboka ye ya tumine nale ooshako dhuusila wepungu. Aahololimadhilaadhilo mboka oya tsu kumwe opo ya yambidhidhe nooN$600 miikulya muule wethimbo ndyoka taya kala pehala ndyoka.
Pahapu dhaNdeunyema, Namvet oku na iilyo ya thika po-20 000 mbyoka yiishangitha, mbyoka oyindji yili pokati koomvula 50 no-57.
CATHERINE SASMAN