Ngoka ta longo pehala lyOmukomeho gwElongo mOshitopolwa shaShana, Immanuel Haipanda, okwa popi kutya okwa uvithwa nayi kiizemo yondondo onti-12 moshitopolwa. Moonkundathana dhoka aningwa naye koshifokundaneki shoNamibian Sun, Haipanda okwa popi kutya iizemo yondondo onti-12 mbyoka ya likolwa koshitopolwa omvula ya piti, itayi vulu okupopilwa.
"Oshitopolwa shetu oshi li ponomola ontiyali miizemo yekonaakono lyondondo onti-10, omolwashike itatu vulu okutulwa ponomola yotango nenge ontiyali miizemo yondondo onti-12? Ndjika ondjokonona ombwiinayi noonkondo," Haipanda ta ti.
Oshitopolwa shaShana osha gu pohi noonkatu ne, okuza pehala eti-9 mo-2014 okuya pehala eti-13 momvula yo-2015.
Nonando ongaaka mekonaakono lyondondo onti-10, Oshana oyi li ponomola ontiyali yalandula Oshitopolwa shaShikoto.
Haipanda okwa popi kutya endopo ndyoka nali kale omaipopilo gokulonga nuudhiginini.
"Ngele otwa tokola nokulonga nuudhiginini omolwa endopo ndika nena otatu ka pondola nokumona iizemo iiwanawa."
Haipanda okwa popi kutya okwa ningi omutumba naakonaakoni yelongo moshitopolwa opo ya kundathane nkene ye na okugandja ekwatho kooskola.
Oshizemo shimwe shomitumba dhoka dha ningwa , aakonaakoni yelongo otaya ka kala taya talelepo ooskola kehe oshiwike opo ya tale kutya ooskola otadhi shi enditha ngiini, yo kaya tegelele owala okutalelepo ooskola hoka haku ningwa pehulilo lyomvula.
"Otwa tokola tu tameke opo tu kwashilipaleke kutya ooskola otadhi pula ngiini komeho kehe oshiwike."
Haipanda okwa popi kutya petameko lyomvula, ooskola ohadhi ipopile niilonga yilwe naashoka osho hashi etitha kwaaha longwe sha moongulu dhoskola.
"Itatu ka taambako we omaipopilo ngoka gokuhepitha ethimbo petameko lyoskola. Nge tashi ya komatambulo petameko lyoskola, aalongi owala aashona naakuluntuskola mboka haya kala yiipyakidhila nomatambulo. Aalongi yalwe otaya ningi shike?"
Haipanda okwa zimine kutya ope na omaupyakdhi ngoka ga taalela shili oshitopolwa shawo, ngaashi ompumbwe yoongulu dhoskola.
Haipanda okwa tsu omukumo aanaskola yondondo onti-12 opo ya longe nuudhiginini yo ya vule okulikola iitsa iiwanawa tayi ya falitha kouniversiti momvula twa taalela.
KENYA KAMBOWE