Shoka osha landula oshiningwanima shoka sha ningwa mEtitano lya piti, sho aanona mboka ya valelwa mekondjo taya pula oompito dhiilonga nekwatho okuza kepangelo yiipumu mumwe naakalimo yomoBrakwater. Swapo okwa popi kutya oshikumungu shaanona mboka otashi ungaungiwa nasho pankatu yopapangelo.
Nonando kape na uuyelele wa gwana kombinga yaashoka ha etitha iikolokosha mbyoka ya tameke mEtine, otaku popiwa kutya oshiningwanima shoka osha tukulwa sho gumwe gwomaakalimo yomoBrakwater apumu noshiyenditho gumwe gwomaanona mboka, konima sho yatatu yomaanona mboka yali yayi meni lyofaalama ye opo yaka konge iikuni.
Oshikumungu shoka osha eta woo polweela onkalo moka mu na aanona mboka sho mofaalama moka ye li kamu na omeya oshowo olusheno.
Aanona mboka oyali ya falwa kehala ndyoka omvula ya piti nomambesa gamuni sha landula omutumba ngoka ya ningi nAmushanga gwoSwapo, Nangolo Mbumba.
Mbumba okwa ekelehi oshinakugwanithwa shetembulo lyaanona mboka ta ti kutya kaye shi uupyakadhi waSwapo.
"Oho zi peni ngashiingeyi, ongundu yoye oyo ye ku falako hoka ho zi? Ino pulandje ngaaka," Mbumba ta yamukula omapulo ngoka apulwa.
Sho a pulwa ngele kashi shi Ongundu yoSwapo ndjoka ya tembulile aanona mboka kofaalama ndjoka, Mbumba okwa yamukula kutya oshikumungu shaanona mboka oshi li oshikumungu shopashigwana na otashi ungaungiwa nasho kepangelo.
Okwa popi kutya epangelo otali ka gandja omayamukulo koshikumungu shoka kuyele, na okwa tulapo ongodhi.
Aanona mboka oya tindi oolopota kutya oya ningi iikolokosha mEtine. Sho ya gandja ombinga yehokololo lyawo, gumwe gwomaakomeho yongundu yaanyasha mboka, Martin Negumbo okwa lombwele oshifokundaneki shoNamibian Sun kutya, okwa geya noonkondo molwaashoka oshiningwanima shoka sha holoka ongulohi yEtine osha li shi na okuyandwa.
Pahapu dhaNegumbo, yatatu yomiilyo yawo oya yi yaka konge iikuni mEtine sho gumwe a pumwa noshiyenditho komukalimo gwomoBrakwater, ngoka a tumbulwa kedhina kutya oNaas Fourie.
Negumbo okwa popi kutya Fourie ina kankama konima sho omupumu omunyasha ngoka naashoka osho sha etitha aanyasha mboka ye mu landule sigo okegumbo lye.
"Otwa kutha ohauto yetu na otwe mu landula, sho twa thiki pegumbo lye okwa tameke te tuumbu nondjembo. Otwe mu vulu oonkondo na otwe mu kutha ondjembo ye ihe oyana yaali oya tameke taye tuumbu," Negumbo ta ti.
Iilyo yetanga lyokukeelela iimbuluma momudhingoloko ngoka oya thiki pehala mpoka, niikolokosha mbyoka oya falitha aantu yatatu moshipangelo.
"Oshilyo shetu shimwe osha yahwa mokwaako, shimwe osha dhengwa nondjembo momutse na oya falwa pamwe koshipangelo naangoka apumwa koshiyenditho," Negumbo ta ti.
Fourie okwa tetwa nekatana kothingo, omanga omunashipundi gwongundu yokukeelela iimbuluma momudhingoloko ngoka Atousa Fischer-Buder na ye a yi moshipangelo molwaashoka okwa ehamekwa kothingo.
Ohauto 'yaanona yekondjelomanguluko' yi na oombululu dhooholo, oya adhika komeho gegumbo lyaFourie.
Konima yohauto ndjoka oku na ekuwa.
Gumwe gwomaanona mboka, Tangeni Simon okwa pula epangelo li ya tembuthwe molwashoka otashi vulika gumwe gwomuyo adhipagwe.
"Huka otuli ko naatiligane mboka ye tu tonde noonkondo. Oya kala noku tulombwela kutya oye tu tonde na onda tila owala kutya otashi vulika tu dhipagwe koombulu."
Simon, ngoka a yahwa kopolisi noholo yongumi, okwa popi kutya okuli mongundu yaamboka ya shuna kegumbo lyaFourie mEtitano opo ya ka tale iinima yawo mbyoka ya kanithile molugodhi lyongulohi yEtine.
"Opolisi oye shi kuthako kutya otwa hala natango okulwa, ihe tse shoka twa li twa hala oongodhi dhetu owala dhopeke dhoka twa kanitha," Simon ta ti.
Omugandji gomakwatho gopaulumomhumbwe gwehangano lyopaumwene, Percy Openshaw, okwa popi kutya okwa dhengelwa ongodhi lyopotundi 19:00 kombinga yaantu yatatu yomomudhingoloko mboka ya nkapwa nomakatana na oya dhwengwa nomamanya.
Openshaw okwa popi kutya sho a yi kehala ndyoka, ondjila oya li ya patwa kaantu ya thika lwopo-40, mboka ya tameke okuumba ohauto yoambulansa nomamanya.
"Onda umbu ooholo mbali mombanda na onda pula oohauto mbali dhopolisi opo dhi tukwathele mokugandja ekwatho kaantu mboka ya ehamekwa. Onkalo oya li yapiyagana noonkondo nopolisi inayi vula okutukwathela," Openshaw ta ti.
Omolwa ekateko, Openshaw sho adhiki megumbo lyaFourie okwa adha mboka ya ehamekwa ya falwa nale koshipangelo nohauto yopaumwene.
Kape na ngoka atulwa miipandeko
Nonando oshikumungu shoka otashi kundathanwa komapandja gomakwatathano gopainternet nooradio, Mayola-Ndjai mOpolisi yaNamibia, James Tjivikua, okwa lomnwele iikundaneki mEtitano kutya kape na ngoka atulwa miipandeko ihe aakonaakoni otaya konaakona oshiningwanima shoka.
Tjivikua okwa popi kutya iipotha ngaashi omaponokelo, omaehameko, oonkambadhala dhedhipago, eyonagulo lyomaliko oshowo okuya mehala lyaantu shaali paveta otayi konaakonwa.
MEtitano opolisi oya kala momudhingoloko ngoka opo yi kalekepo ombili negameno.
"Ope na oongundu mbali dhaakonaakoni, ongundu yimwe otayi konaakona omapopyo gaanona yekondjelomanguluko omanga onkwawo tayi konaakona omapopyo gaakalimo yomoBrakwater," Tjivikua ta ti.
Pahapu dhopolisi, aantu yane oya ehamekelwa miikolokosha mbyoka: yaali 'aanona yekondjelomanguluko' omanga yaali aakalimo yomoBrakwater. Yaali inaya ehamekwa unene.
GORDON JOSEPH & MERJA IILEKA
Category: