Erick Endjala okwa popi kutya onkalo pehala ndyoka oya piyagana noonkondo naakiintu mboka haye ya po yaana omategelelo ohaya shuna komagumbo ye na omategelelo.
Endjala okwa popi ngaaka pethimbo a gandja olopota yopoloyeka yoTukwathela Mother’s Shelter, opoloyeka ndjoka ya talikako kutya oyo tayi ka kandulapo ompumbwe nuupyakadhi womahala gokutegelela kaakiintu mboka yiihumbata momudhingoloko ngoka.
Endjala okwa popi kutya nonando ompangela odhali andola okumanitha owala etulo lyolusheno nominino dhiiyelwahi mehala moka no ku li gandja kaakiintu, oya ningi omalunduluko opo oshitopolwa oshitiyali shiilonga shi manithwe.
“Okomitiye ndjoka tayi kwatele komeho iilonga mboka oya mono iiyemo okuza koUnesco mbyoka tayi ka manitha iilonga ayihe mwa kwatelwa etungitho lyoshitopolwa oshitiyali,” Endjala ta ti.
Opoloyeka ndjoka otayi kwatelwa komeho kaakaleli po ya za mOutapi Town Council, Omusati Regional Council, Ombalantu Traditional Authority oshowo aanuundjolowele kohi yOmusati Region Governor’s Social Trust.
Omatungo ngoka oga kwatelamo oondunda dhokulala, uuyiyogelo nuundjugo, okombitha noondunda dhokupungula na otaga vulu okukala naantu 40 sigo 50 poshikando.
Oshitopolwa oshitiyali osha nuninwa okugwedha etungo ndyoka lya manithwa nale opo ku vule okugandjwa ekwatho kaakiintu oyendji poshikando.
Endjala okwa popi kutya nonando ehala ndyoka olya nuninwa aakintu mboka yiihumbata, okwa popi kutya aazaizai oshowo aakongi yiilonga otaya longitha ehala ndyoka.
“Oyendji mboka taya adhika mehala moka kaye na omategelelo iha Aangola mboka ye ya moshilongo okukonga iilonga. Ohaya dhike owala ootenda dhawo nokukala poolwaamba lwaakiintu mboka ye na omategelelo. Inatu ya tidha po omolwa uukumwe na inatu hala okuninga nayi aantu mboka ya taalela nale omaudhigu moonkalamwenyo dhawo ihe oshili ooshoka kutya oyendji mboka yeli mpoka hayo ya nuninwa ehala ndyoka,” Endjala ta ti.
Endjala okwa popi woo kutya ope na onkalo yimwe mpoka omukadhona atidhwa megumbo kaavali ye ihe okwa yi a ka kale pehala mpoka pamwe nomumati gwe.
“Uuna ehala lya pu okutungwa otatu ka wapalekapo mpoka, otatu ka pula opolisi yi tukwathele. Ope na aakiintu yamwe mboka taya ka tsikila nokukala pehala mpoka molwaashoka oye wete kutya itaya ka vula okukala taya futu iifuta mbyoka tayi ka pulwa. Pauyele mboka wa li wa gandjwa, owa holola kutya omudhingoloko gwaOutapi ogu na aakiintu yoomvula dhokumona uunona ya thika po-19 298.
Molwaashoka omandiki guundjolowele nuuklinika moshitopolwa ohawu gandja owala omakwatho gokupulumutha uuna pena onkalo yopaulumomhumbwe, aakiintu mboka yiihumbata ohaya thiminikwa konkalo opo ya ka konge omahala gokukala ge li popepi noshipangelo molwaashoka aantu oyendji ohaya zi kokule niipangelo.
Uuna opoloyeka ndjoka ya pu, otayi ka vula okukala naakiintu 100 poshikando.
MERJA IILEKA
Category: