Okanona komasiku ga7 okeli momusholondondo gwaantu yane mboka ya dhipagelwa moshiponga shoka sha ehameke aantu omu-15. Oshiponga shoka osha ningilwa oshinano shookilometa omi-60 pondje yaMaltahöhe ongula yOmandaha.
Aantu omu-19 mboka ya li moshiyenditho shoka ayehe aaniilonga yegumbo lyaayenda lyedhina Le-Mirage Resort and Spa pamwe nuunona wawo.
Egumbo ndyoka lyaayenda ndyoka otali adhika oshinano shookilometa 21 okuza momuyelo gwaSesriem okuya moSossusvlei moNamib-Naukluft Park.
Pahapu dhOmupeha kOmufala gwOpolisi yOshitopolwa shaHardap, Joseph Geiseb, oya lopotelwa oshiponga shoka lyopotundi onti-08:00 mOmaandaha.
Geises okwa popi kutya omuhingi gwohauto yoLand Cruiser yombaki yehangano lyegumbo ndyoka lyaayenda, okwa li ta fala uunona koskola moMalinda noMaltahöhe konima sho wa li wa yi kefudho kaavali yawo mboka haya longo kegumbo ndyoka lyaayenda.
Okwa popi kutya oshiyenditho shoka osha li zi kehala lyiilonga okupitila moMaltahöhe na osha pitamo moZarris Pass konyala oshinano shookilometa 60 okuza mondoolopa sho oshiponga sha holoka.
Pahapu dhaGeiseb, omuhingi gwohauto ndjoka okwa li ta hingilile noonkondo sho etayiyela lyohauto lya topa sha etitha ohauto yi galangate. Ohauto oya li woo ya tsilika sha pitilila, molwaashoka Geiseb okwa popi kutya ohauto yombaki oya uthwa okuhambata owala aantu yahamano konima.
Omadhina gaamboka ya ningi iihakanwa yoshiponga shoka inaga vula okutumbulwa molwaashoka aapambele yawo inaya tseyithilwa natango.
Omuhingi omunamimvo 43, pamwe naanona yatatu oya hulithila moshiponga shoka. Mokati kaanona mboka ya hulitha omwa kwatelwa ohanana yokamati ndjoka ya valwa owala momasiku ga4 gaJanuary oshowo uukadhona uwali woomvula 16 no 15.
Opolisi oya holola kutya yina yohanana ndjoka okwa ehamekelwa moshiponga noonkondo naamboka ya ehamekelwa moshiponga omwa kwatelwa aakuluntu naanona.
Mboka ya ehamekwa kashona oya ka mona epango moshipangelo Maltahöhe, omanga mboka ya ehamekwa unene ya tuminwa moMalinda naVenduka.
Oshiponga shoka osha holoka esiku limwe sho kwiitsuwa omidhimba mbali dhaatalelipo Aagermany dhoka dha adhika moFish River Canyon.
Zelna Hengari, ngoka eli omukomeho gwoNamibia Wildlife Resorts, okwa a gandja omahekeleko koLe-Mirage Resort & Spa moNamib-Naukluft, omolwa oshiponga shoka sha faalela aaniilonga oshowo aanona yawo.
ELLANIE SMIT