Uuministeli wUundjolowele nOnkalonawa oya hulitha po okugandja omakwatho gopaulumomhumbwe mOvenduka omolwa ompumbwe yooambulansa naaniilonga yomakwatho gopaulumomhumbwe.
Aanuumvu mOvenduka mboka taya ehamenene na oya pumbwa okukatalwa komagumbo gawo ya falwe moshipangelo shaKatutura State Hospital nenge moWindhoek Central Hospital ohaya ukithwa komayakulo goambulansa yElelo lyoshilando.
Elelo lyaVenduka oli na owala oombulansa ne naashoka osha ningitha woo oshidhigu opo li gandje omakwatho ngaashi tashi pumbiwa.
Ominista yUundjolowele nOnkalonawa, Omundohotola Bernard Haufiku, okwa yelitha kutya amushanga nale takalele Andrew Ndishishi okwa tokola mo-2013 opo a kalekwe egandjo lyomayakulo ngoka mOvenduka molwaashoka otaga longithwa pambambo kaakwashigwana nonando oshikondo osha taalela nale ompumbwe yiiyenditho mbyoka.
Monena oombulansa mOvenduka ohadhi longithwa owala okundalasipota aanuumvu pokati kiipangelo.
"Aantu oya ningi iihakanwa yonkalo ndjoka. Omupya omunene omayakulo ngoka oga kala taga longithwa pambambo, aantu mboka ya longithwa iikolitha nenge taya vulu owala okufalwa koshipangelo niihauto yopaumwene oya kala taya dhengele oombulansa. Otu na nale ompumbwe yiiyenditho mbyoka nonena uuna iiyenditho mbyoka tayi longithwa pambambo itatu vulu okugandja omakwatho ngoka molwaashoka oge na ondilo," Haufiku ta ti.
Ofamili ndjoka kaayi na uuwanawa wepango lyopaumwene oya li ya dhengele oshikundanekifo shoNamibian Sun, taya nyenyeta kutya itaya vulu okufala koshipangelo hekulu gwoomvula 75, konima sho a gu nokweehama unene omanga a li megumbo oye awike.
Onkambadhala okumona ekwatho okuza kuMuni inadhi kwatha sha molwaashoka ooambulansa dhaMuni adhihe odha li dhiipyakidhila.
"Shika oshi li uupyakadhi kaantu mboka yaana omauwanawa gomapango gopaumwene. Ope na ompito onene aantu ya se molwaashoka itaya vulu okuya kiipangelo pethimbo molwaashoka omagandjo gomayakulo oge na omilandu dha yaga kaantu na itaku gandjwa omakwatho nokwaamboka ye li mompumbwe," ofamili ya ti.
Nonando ongaaka, Haufiku okwa popi kutya ye pamwe namushanga takalele, Andreas Mwoombola otaya ka talulula oshikumungu shoka.
Okwa popi kutya ope na omayele opo ku tulwe omukalo gwokutala ngele nakupula eyakulo ndyoka okuli tuu shili mompumbwe opo ku yandwe elongitho pambambo lyomayakulo.
Haufiku okwa gwedha po woo kutya ope na ompumbwe yokulonga oshigwana kutya oonkalo dhini tadhi pula shili omayakulo ngoka opo owala ku vule okugandjwa pethimbo omayakulo kwaamboka taye ga pumbwa.
Haufiku okwa popi woo kutya otaya pangele okulundululila iihauto yo-4x4 miihauto yoambulansa opo ku vule ku gandjwe omayakulo kaakwashigwana yomomikunda.
"Ota tu tameke niitopolwa ngaashi Kunene, Zambezi, Kavango oshowo //Karas."
MERJA ILEKA
Category: