Lucas Nepela Nicodemus, 46, ota tamanekelwa edhipago lyaakiintu yaali mboka omalutu gawo ga hwikwapo na oga adhika ga ekelwa metoto lyiiyagaya pondje yoshilando shaVenduka ongula yEtine lya piti.
Nicodemus, ngoka a ningi omatilitho kutya otiikutha omwenyo pethimbo a tulwa miipandeko okwa holoka komeho yOmpangu yaMangestrata gwaVenduka mOmaandaha. Okwa popi kutya okwa ningilwa omatilitho geso kaanadholongo yakwawo modholongo.
Sho a tulwa miipandeko okwa li iidhililwa mondjeedhililo yopOkapale kaHosea Kuutako ihe Omufali gwiihokolola kompangu gwepangelo Ivan Tjizu okwa lombwele ompangu kutya okwa ningwa omalongekidho opo a lundululilwe mOndholongo Onene yaVenduka.
Tjizu okwa tindi opo omutamanekwa a pewe ompito yokwiifutilamo modholongo molwaashoka oshimbuluma shoka a longo oshinene noonkondo.
Mangestrata okwa yelitha kutya Nicodemus okuna uuthemba opo a kalelwe po paveta.
Nicodemus okwa pula omukalelipo gwopaveta. Okwa popi woo kutya ita zimine ondjo miipotha yomadhipago mbyoka ta tamanekelwa oshowo onkambadhala dhokuya moshipala iilonga yuuyuki.
Omupanguli okwa gandja elombwelo omutamanekwa a lundululilwe mOndholongo Onene yaVenduka noshipotha osha undulilwa komasiku 9 gaMaalitsa.
FRED GOEIEMAN
Category: