Gumwe gwomaanamagumbo, ngoka egumbo lye nehala lyongeshefa ye lya hanagulwapo komunangeshefa omuChina okwa popi kutya okwa haluthwa noonkondo mokuuva kutya omuChina ngoka okwa futa ooyene yomagumbo ngoka ga hanagulwa po nonando iimaliwa mbyoka inayi dhika kooyene.
"Onda yi kehala hoka kwa li egumbo lyandje ndyoka lya hanagulwapo oshiwike sha piti opo ndi ka kutheko oopaala dhandje niinima yilwe mbyoka nda hala okulongitha ihe onda tamanekithwa komuChina gumwe ngoka uula ndje kutya ngame okutamekithi guupyakadhi," Selma Hatutale, ngoka e li oshilyo shOkongo Tailoring project ta ti.
Ehanagulepo lyomagumbo ndyoka olya tameke momasiku 30 gaDesemba, nomuChina ngoka aniwa okwa lombwele Hatutale kutya ina pumbwa okukutha oopaala dhoka molwaashoka okwa futwa.
"Onda haluka mokuuva ngaaka molwaashoka inandi futwa sha. Sho nda ningile omuChina ngoka omapulo okwa lombwelendje opo ndi ukithe omapulo gandje kElelo lyOmukunda ngoka."
Hatutale okwa yi a ka ninge omapulaapulo kombelewa yElelo lyOmukunda ngoka ihe omunambelewa okwe mu yolo kutya ngiika ina uvako shoka omuChina ngoka a popi.
"Oya pendje omayele aniwa ndi shune ko komuChina ngoka pamwe nomuntu ngoka taka fatululilandje. Kandi shi kutya ano oshike sha ningwa po."
"Kandi shi shoka sha ningwa po," Kansela gwaKongo
Fanuel Ndadi, a popi sho aningwa omapulaapulo.
Ndadi okwa popi kutya aantu ohaya ukitha owala oombedhi maanapolotika ihe iinima yimwe otayi ningwa kaanambelewa pwaahena ontseyo yasha okuza kaanapolotika.
"Onga kansela onda pumbwa okulombwelwa iikumungu ayihe mbyoka tayi holoka na oya guma oonkalamwenyo dhaakwashigwana. Inandi lombwelwa kombinga yehanagulepo lyomagumbo ngoka ihe sho nda uvu omanyanyeto ngoka nda pula ndi ninge omutumba naanambelewa yelelo lyomukunda ihe omutumba ngoka inagu ningwa sigo onena," Ndadi ta ti.
Kombinga yiifuta mbyoka inayi thika natango kansela okwa popi kutya omilandu odhi li dha yela kutya ohaku ningwa ngiini uuna taku tulululwa aantu nenge aantu taya kuthwa omahala gawo.
Pahapu dhe omilandu dhoka odhi na aluhe okulandulwa opo ku yandwe okuuvitha nayi aantu.
"Otwa pumbwa okwiihumbatela aantu pauntu. Mboka aantu yetu na otwa pumbwa okuya kongela omahala omanga inatu ya kutha pomahala mpoka yeli nongele ope na iifuta nena aantu oya pumbwa okufutwa."
Sho a li a popi noshikundaneki shika, Omunashipundi gwElelo lyOmukunda gwaKongo, Paulus Mwahanyekange okwa popi kutya okwa gandjwa omahala gokuza gopakathimbo kwaamboka ya gumwa omanga taya tungilwa omahala gawo.
PLACIDO HILUKILWA