Ondoolopa yaMbaye oya ulika nale ooplota dha thika pe-1000 omanga Ondoolopa yaShakatyi nayo ya ulika ehala mpoka tapu wapalekwa ihe Oshilando natango inashi ninga po sha.
Elelo lyaVenduka olya popi kutya ekateko ndyoka itali ningilwa owina ihe otali etithwa kuupyakadhi wopautekinika.
Oondoolopa dhoka ndatu odhili oshitopolwa shopoloyeka ndjoka ya pumbwa okuwapaleka ooplota dha thika po-200 000 moshilongo ashihe kohi yetsokumwe pokati kEpangelo nEhwahwameko lyoAffirmative Repositioning (AR) , etsokumwe ndyoka lya shainwa omvula ya piti.
Oshakati osha pewa oomwedhi hetatu opo yimanithe ewapaleko lyevi moprogramma ndjoka omanga Ombaye tayi tsikile nokuwapaleka ooplota odhindji noAR oya popi kutya ope na ooplota dhimwe dhi na okugandjwa pehulilo lyomvula ndjika.
Okwa holoka omaiyuvo kutya ekatathano lyankundipala pokati kamayola gwaVenduka Muesee Kazapua gomutotipo gwoAR Job Amupanda,ndyoka lya tameke noontamanana dhoka dha li dha kwatithwa okavideo otashi vulika olyo lya etitha ekateko ndyoka.
“Shika kashi shi oshinima shomuntu gumwe. Tse otu li oshitopolwa shokomitiye pamwe noAR oshowo uuministeli . Ekateko ndyoka olya kundathanwa kokomitiye,” omupopiliko gwOshilando shaVenduka Joshua Amukugo ta ti.
“Uuna pe na omaunkundi gontumba ngoka taga yi moshipala otwa pumbwa okutala koombinga dhihe onkene omapopyo kutya otaku gamenwa uuwanawa waanenentu kage li mondjila,” Amukugo ta ti.
Amukugo okwa popi kutya elelo oli na omukumo kutya otaku manithwa nuumvo ewapaleko lyevi ndyoka, opo evi li vule okugandjwa kAanamibia mboka ye li mompumbwe yomahala gokukala.
Omanga inaku adhika etsokumwe ndyoka lyaadhika pokati kepangelo noAR, aaleli yoAR, Amupanda, George Kambala naDee Nauyoma oya ningi omatilitho kutya Aanamibia mboka yaahena evi otaya kiikuthila evi uuna epangelo inali ya po nekandulepo lyomukundu gwevi moshilongo.
Aahwahwameki mboka yatatu oya kwatele komeho eningo lyomaindilo gevi moshilongo ashihe moka aantu ya thika po-50 000 ya ningi omaindilo uunene moondoolopa dha yooloka moshilongo.
Kambala okwa popi oshiwike sha piti kutya, okuniwe einekelo kutya Aambaye nAashakati otaya mono evi okuya pehulilo lyomvula ndjika.
“Kutya oolye taya ka mona ooplota, itandi vulu oku shi tseya pethimbo ndika ihe shoka ndi shi okutya owala Ovenduka oyili natango konima nongele onkalo otayi thiminike nena otatu ka ninga omalunduluko nokupula egwanithepo lyetsokumwe.”
ELVIS MURARANGANDA