Opolisi yaNamibia oye shi pondola okumona ohauto ndjoka konima yoowili ooshona ihe oongangala dhoka odhe shi pondola woo okuya ontuku noshimaliwa sha thika poo-N$194 000.
Ohauto ndjoka yonomola (N 696 SH) yomunangeshefa Jairus Shaalukeni, ngoka egumbo lye mOluno lyiiteyelwa koongangala omanga a li molweendo lyopangeshefa mOshakati.
Shaalukeni ngoka e na ongeshefa yiikwamalusheno okwa popi kutya okwa yi kOshakati lyopotundi onti-08:00 na okwa li e na okugaluka meendelelo opo a ka tale iimaliwa mbyoka taka futa aantu mboka e na omikuli dhawo ihe sho a galuka omutenya iimaliwa ye nohauto yongushu yoomiliyona 1.8 kayimo megumbo.
Oombudhi dhoka dha teya egumbo odha adha oshapi yohauto oshowo
oshowo oshimaliwa shooN$94 000 moshiketha shokupungula omanga oshimaliwa shooN$100 000 sha li mondjato.
Iinima ye yilwe yongushu nayo oya yakwapo.
Shaalukeni okwa popi kutya iha kala unene niimaliwa yomuyalu omunene megumbo.
"Onda li tandi ka longitha iimaliwa mbyoka mokufuta iinima yaantu esiku ndyoka," Shaalukeni ta ti.
Sho a popi pethimbo ohauto ye e yi pewa, Shaalukeni okwa pandula Opolisi yaNamibia sho yeendelele mokumupa ekwatho konima sho oshimbuluma shoka sha lopotwa oshowo aakwashigwana mboka ya longele kumwe nopolisi.
Komanda gOpolisi yaShana Rauha Amwele okwa popi kutya aanambelewa yopolisi oya topolelwa oshitopolwa ashihe konima sho oshimbuluma sha lopotwa nOpolisi yomIitopolwa yopuushiinda ngaashi Ohangwena, Omusati, Oshikoto nOkavango West oya li ya lopotelwa.
Okwa tumwa etumwalaka kiikundaneki opo oshigwana shi vule okuyambidhidha opolisi mokukwatako oshiyenditho shoka nokutula miipandeko ookalyamupombo mboka.
Opolisi yaHangwena oya mono ohauto ndjoka lyopotundi onti-16:00 yaadhika ya kankamekwa komeho gostola yoWoermann Brock mEenhana nonomola yohauto ndjola oya kuthwako ya holekwa meni lyohauto.
Amwele okwa popi kutya oongangala odha tokola okuthigapo ohauto ndjoka sho dha dhimbilula kutya kape na we mpoka tadhi vulu okupita molwaashoka opolisi oyali tayi patolola omahala agehe. Mboka haya yi ketoto lyiiyagaya mOndangwa nayo oya kwathele opolisi mokumona iinima yilwe mbyoka ya yakwa, oshowo ohauto ndjoka ya longithwa okuya kehala lyoshimbuluma.
Gumwe gwomoongangala okwa ningi epuko sho a yi ketoto nokuka ekelahi iinima yimwe mbyoka yaana oshilonga oshowo oshiketha shokupungula shoka ya teya.
Aantu mboka aniwa oyali ya ningile omulumentu ngoka omapulaapula sha etithwa a ze po pehala ndyoka ihe ohauto yoNissan March ndjoka ali ta hingi yonomola (N 6228 EN) oya gwile melambo nomuhingi okwa zi po koompadhi.
Opolisi oya tseyithilwa niinima yilwe ngaashi ooshapi yimwe yohauto yoRange Rover oya adhika mohauto moka.
Amwele okwa popi kutya opolisi oyi na nale uuyelele wa mwene gwohauto ndjoka.
Iipotha oyindji yuulunga wiihauto oya lopotelwa opolisi yaShana moomwedhi sha piti nopolisi oyeshi pondola okukwatako ne dhomoohauto ntano shoka sha yakelwa moAngola.
"Otaku fekelwa kutya moAngola omu na ongeshefa onene yiihauto mbyoka ya yakwa ihe nonando ongaaka otatu mono eyambidhidho okuza koombushe yetu miilonga yaAngola uuna tweya tseyithile kombinga yohauto ya yakwa," Amwele ta ti.
PLACIDO HILUKILWA