Aalongi momeya oyendji oya shuna kiilonga omanga oyendji natango mboka ya tsikile nokukala mekanka lyawo ndyoka lyaali paveta taya pula oondjambi dhili hwepo, yeli momalimbililo gonkalonawa yawo pamwe noofamili dhawo.
“Ekanka ndika olye tu guma nayi noonkondo. Tse otu na oofamili dhetu na otwa taalela woo omaupyakadhi galwe natwa pumbwa iimaliwa yokufuta omahala getu moka hatu zi noomikuli dhaantu dhoka tu na otadhi londo pombanda kehe esiku,” aaniilonga mboka taya ti.
Aaniilonga mboka oya popi kutya oofamili dhawo odha tegelela okusilwa oshipwiyu pethimbo ndika lyiituthi yomatango omanene molwaashoka yamwe oyo owala haya longo moofamili dhawo naaniilonga mboka monena oye li mekanka uule woomwedhi mbali na inaya mona iiyemo yasha.
“Tse yamwe otwa shuna kiilonga sha landula omalombwelo ngoka twa pewa komalelo gomahangano getu. Otwa ningilwa omitumba dhomautho ihe otwa tidhwa miilonga omolwa okukutha ombinga mekanka lyaali paveta konima sho twa longele omahangano ngoka uule woomvula 12. Otashi ulike kutya konyala ayehe mboka ya kutha ombinga mekanka otaya tidhwa miilonga.”
Sho a ningilwa omapulaapulo kombinga yekanka ndyoka li li natango metifa, Minista gwOshikondo shOohi nOonzo dhOmomeya, Bernhard Esau okwa popi kutya onkalo ndjoka otayi limbilike noonkondo na oya guma noonkondo oshikondo shoka.
“Oshikako shokukwata oohi osha tamekele muNovemba, okutala kethimbo ndyoka lya hepa oshowo aaniilonga mboka ya shuna kiilonga otashi ulike ombinga ombwaanawa. Omahangano ogendji ohaga mono iimaliwa owala pethimbo ndika,” Esau ta ti.
Omupresidende gwoMining, Maritime, Metal and Construction (MMMC) union , Immanuel Petrus, okwa popi kutya onkalo ndjoka yekanka oya guma aantu ayehe.
Oshipotha shompangu shoka tashi nongonona etsokumwe ndyoka lya shainwa kuyele omvula ndjika pokati kUuministeli wAaniilonga nEtotepo lyOompito dhIilonga oshowo aakuthimbinga ayehe moshikondo nomahangano omakalelipo gaaniilonga osha undulilwa komasiku 10 gaFebruali.
“Omukalo gwokupula komeho omupu noonkondo. Aaniilonga inaya hala okushuna kiilonga ngele onkalo yiilonga ndjoka itaya popile oyo tayi kala miilonga natango. Aaniilonga oya hala onkalo yawo yiilonga yilundululwe. Aaniilonga ya thika po-205 oya shuna kiilonga konima sho omahangano ngaashi Overberg Fishing, Embwida Fishing, Ekikimbo Trawling noRainbow Trawling ya adha etsokumwe opo ku ningwe oonkundathana dhoka muJanuari 2016. Omahangano ogendji inage ya kutse opo tuye nago moonkundathana. Uupika waaniilonga itawu popilwa kekotampango lyaaniilonga,” Petrus ta ti.
Petrus okwa tsikile kutya Marco Fishing okwa li a pula aaniilonga ye ya thika po-30 opo ya shune kiilonga yawo ihe omilandu dhoka ya tula po otadhi yi pondje Ekotampango lyAaniilonga nehangano ndyoka olya li lya gandja omayele kiilyo yalyo.
Pahapu dhOmupresidende gwoNamibian Fisheries Industry & Fishermen Workers Union (NFI&FWU) Daniel Imbili, okwa popi kutya omahangano gamwe oga ningile aaniilonga omitumba dhomautho kuyele Desemba na oga tokola okutidha aaniilonga. Hangana okwa tidha aaniilonga 108 omanga Namsov a tidha aaniilonga o- 34. Aaniilonga mboka oya tidhwa omolwa ekuthombinga lyawo mekanka lyaali paveta.
Aaniilonga mboka otaya ka mona owala iimaliwa yawo yopenzela konima yiiwike ihamano.
“Ethimbo ele noonkondo okukala wa tegelela iimaliwa yoye yopenzela omanga wa pumbwa iimaliwa. Kandi na we shoka tandi vulu okuninga shi vule okukonga po iilonga yimwe. Itandi vulu okukala nda tegelela owala eyamukulo okuza kehangano lyaaniilonga omanga ofamili yandje tayi si ondjala, nena ngele oshizemo osha kala kashi li muuwanawa wetu otandi ningi ngiini? Onda li nda mono iilonga yimwe ihe inandi vula okukatameka iilonga omolwa iikumungu yilwe mbyoka nda li inandi manitha kegumbo. Otashi kala oshidhigu okudhigila omukulukadhi gwandje oshinakugwanithwa shoku sila oshipwiyu ofamili yandje,” omuniilonga gumwe ta ti.
Matti Amukwa, omunashipundi gwoConfederation of Namibian Fishing Associations, okwa ti ekanka ndyoka olya thiminike omahangano moshikondo shoka ga shunithe pevi ondjele yawo yiilonga.
“Ekanka ndyoka tali ningwa kaaniilonga ya thika po-800 olya guma nayi noonkondo oshikondo. Aaniilonga yamwe oya shuna kiilonga nokutaalela oompangu na oya tameke iilonga yawo,” Amukwa ta ti.
OTIS FINCK