Oopoloyeka odhindji odha idhile omiyelo naaniilonga oya shuna momapandaanda noopoloyeka dhoka dha hupako odha tegelela okuya mondjila ya faathana naadhoka dhiidhile omiyelo ngele uupyakadhi mbyoka inawu kandulwapo.
Ooyene yoopoloyeka dhoka oya popi kutya ongeshefa yawo otayi shuna pevi noonkondo molwa ompumbwe yomeya na itaya vulu we okushunitha omikuli dhaantu dhoka ya li ya kuthwa opo ya vule okulanda oombuto oshowo iilongitho moopoloyeka dhawo.
Yamwe oya idhile oopoloyeka dhawo molwaashoka kayena we omukumo.
Aanafaalama mboka oya kala nokukutha omeya gokutekela iikunino yawo okuza mondama yaNamWater ihe ondama ndjoka otayi pwiinine omolwa omuloka gwa nkundipala ngoka gwa dhidhilikwa moshitopolwa uule woomvula ndatu dha piti na inaku ningwa oonkambadhala dha sha opo ku pombwe omeya okuza momulonga gwaKunene.
Ooyene yoopoloyeka dhoka otaya gandja uusama kepangelo oshowo NamWater kutya shoka oshi li eyo moshipala lyeyambulepo lyeliko lyoshilongo.
Oya popi kutya oya ningi oonkundathana naakuthimbinga oyendji ihe oya ningilwa omauvaneko gowala.
Ehangano lyAanangeshefa mOshilongo ano oNamibian Chamber of Commerce and Industry (NCCI) nalyo oli na ontseyo kombinga yonkalo ndjoka ya taalela aanafaalama mboka.
Omunashipundi gwehangano ndyoka mOnooli yoshilongo, Thomas Iindji okwa li a shangele ombaapila Amushanga takalele mUuministeli wUunamapya ta ndjandjukununa uupyakadhi mboka wa taalela aanafaalama mboka.
Iindji okwa pula uuministeli wu konge omukalo ngoka tagu vulu okugandja ekwatho nokuhupitha oopoloyeka dhuunamapya dhoka molwaashoka onkalo ndjoka otayi etitha woo ekanitho lyoompito dhiilonga.
Gumwe gwomaanafaalama mboka, Gert Prins okwa popi kutya oopoloyeka dhawo dhoka dhokulonga iihape otadhi etithwa opo omalandithilo giihape niiyimati mOngwediva oshowo mOlushandja ga vule okukala itaga longo wee.
"Ompumbwe yomeya uupyakadhi mboka tawu vulu okukandulwa po uuna ngele otwa hala shili Aanamibia ya kale taya longo oondya dhawo yene. Itatu vulu okukondjitha oluhepo ngele otatu dhini oopoloyeka dhoka dha totapo oompito dhiilonga na otadhi gandja omboloto kaakwashigwana noofamili,"Prins ta ti.
Okwa popi kutya okwa li a kuta miilonga aantu o-20 ihe monena okuna owala aaniilonga yatatu nongele onkalo otayi tsikile nena otaka dhiminikwa e ya kuthe woo miilonga.
Omukulukadhi gwe,Vicky okwa kaleke manga oompangela dhe dhokulonga aakiintu yomomudhingoloko ngoka okuninga ondjema.
"Shoka osha li ondjodhi yandje opo ndi yambidhidhe meyambulepo lyoonkalamwenyo dhaakiintu."
Ngoloneya gwOshitopolwa shaMusati, Erginus Endjala okwa popi kutya okuna owino yonkalo ndjoka nepangelo oli li mekwatathano naNamWater opo ku monike ekandulepo lyomukundu.
Lyopokati mpoka oshinano owala shookilometa dhontumba mOnooli yondama yaLushandja, okanala komeya otaka tondoka omeya ngoka geli woo taga kungulukile momidhingoloko dhopuushinda nokanala pokati koongamba dhaCaluegue nEpalela.
"Otu li huka tuna ompumbwe yomeya opo tu pule komeho noopoloyeka dhetu ihe oshinano owala oshishona okuza putse ope na omeya taga hepa na kape na ngoka enako nasha," Prins ta ti.
Omukomeho gwaNamWater Vaino Shivute nenge omupopiliko gwehangano ndyoka Johannes Shigwedha ina ya vula okumonika opo ya ningilwe omapulaapulo.
PLACIDO HILUKILWA