Epangelo otali longo neitulemo mokugandja omahala gokuza geli pamuthika kaanambelewa yopolisi mboka taya longele miitopolwa yomuushayi.
Dhoka oohapu dhomupeha Minista gwOshikondo shOpolisi, Daniel Kashikola pethimbo a patulula pambelelwa Osasiyona yOpolisi mOmufitu-Wanakashole mOngenga ndjoka ya longululwa nokuwapalekwa nawa.
Pahapu dhaKashikola oshi li ondjodhi yepangelo okuya mo-2030 opo Namibia a kale e na omahala omawanawa goosasiyona dhopolisi oshowo omahala gaapolisi gokuza mwakwatelwa woo omandiki gomadheulo.
Okwa popi kutya eyambulepo lyiikwaniilongitho yaapolisi olya nuninwa okulundulula onkalo yegwanithepo lyiilonga lyaanambelewa mboka, nokuninga Namibia ehala lya gamenwa okuza komiyonena.
"Onda hala okupopya mpaka nena kutya omandiki ngaka sho taga longululwa oga nuninwa okuyambulapo onkalonawa yiilyo yoNamPol opo aanambelewa ya vule okugwanithwa po nawa iilonga yawo,"Kashikola ta ti.
Opolisi yOmufitu-Wanakashole oya totwapo mo-2003 nelalakano lyokupatolola oongamba dhaNamibia nAngola oshowo okukandeka iimbuluma momudhingoloko ngoka.
Osasiyona ndjoka otayi gandja ekwatho komikunda dha thika po-27 dhoka dhili olwaamba noongamba.
Aanambelewa mboka taya longele mosasiyona ndjoka oya kala taya longele okuza mootenda sigo osho kwa manithwa etungo lyosasiyona ndjoka momasiku ga-7 gaNovemba, 2015.
“Osasiyona yOmufitu-Wanakashole oyi li yimwe yomoosasiyona dhopolisi dhoka dha longwa nokuwapakelwa nuumvo moshilongo ashihe, nodhindji natango okwa tegelelwa dhi longwe," Kashikola ta ti.
Osasiyona ndjoka monena oyi na oombelewa oshowo omahala gokuza ngoka taga vulu okuza aanambelewa ya thika po-50.
Osasiyona ndjoka oya tungwa koshimaliwa shongushu yoomiliyona 14.7 kehangano tali ithanwa Kaoko Technical Services.
NAMPA