Oohapu dhoka odha tukuka sho gumwe gwoomaalongekidhi yehololomadhilaadhilo ndyoka Christian Maketo, a hogolululwa nokuninga omukomeho gwelelo lyoNampa.
Aniwa omukomeho gwiilonga megumbo lyepangelo na okuli Ominista yIipambele yOmupresidende, Frans Kapofi okwa futu aalongekidhi mboka opo ehololomadhilaadhilo kali pule we komeho.
Aakalimo yomIitopolwa iyali yaKavango oya ningi omatilitho kutya otaya ka ninga omainda moondjila nokuninga eholomadhilaaadhilo poombelewa dhepangelo opo ya gandje omukandanyenyeto gwawo omolwa okatongo hoka taka ningilwa iitopolwa mbyoka nge tashi ya koopoloyeka dhomayambulepo.
Kapofi okwa tindi kutya okwa uvaneke aaunganeki yehololomadhilaadhilo ndyoka omahala giilonga ihe okwa koleke kutya okwa dhengele Ngoloneya gwOshitopolwa shaKavango East, Samuel Mbambo, ta pula uuyelele kombinga yehololomadhilaadhilo ndyoka.
Maketo okwa popi kutya eulikululo lye onga omukomeho gwoNampa olya ziminwa koKabinete omanga inaku longekidhwa ehololomadhilaadhilo ndyoka. Okwa popi kutya aakwashigwana oya hwahwamekwa kaaleli yopamuthigululwakalo miitopolwa mbyoka.
Kuyele Maketo okwa li a shanga kepandja lye lyoFacebook kutya: "Omboma yotango oyili pokutopa moKavango mEtine lyomasiku 17 gaDecemba 2015".
Okwa shanga kutya, aaleli yopamuthigululwakalo oya hwahwameke aalelwa ya ningwe ehololomadhilaadhilo omolwa etidho lyaJoseph Diescho onga omukomeho gwoshiputudhilo shoNipam, ngoka e li omvalele yoshitopolwa shoka.
"Metine lyomasiku 17 gaDecemba nuumvo otaku ka kala ehololomadhilaadhilo enene na otaku ka gandjwa omukandanyenyeto kepangelo moRundu. Aavalwa ayehe yomoshitopolwa shoka oshowo aayambidhidhi otaya indilwa ya galukile kegumbo meyambidhidhp lyaaleli yetu yopamudhigululwakalo," Maketo a shanga koFacebook.
Ihe mesiku ndyoka lya tumbulwa sho aantu ya gongala ya ninge omutumba omanga inaku tamekwa nehololomadhilaadhilo, Maketo okwa popi kutya opolisi inayi gandja epitiko opo aakalimo mboka ya ninge ehololomadhilaadhilo nehololomadhilaadhilo olya kalekwa.
Sho onkundana yeuliko lye onga omukomeho gwelelo lwoNampa ya tseyithwa aantu oya kwatakanitha eulikululo lye ndyoka nekaleko lyehololomadhilaadhilo.
"Ondjambi yokukala miigongi yelelo ndyoka ooN$3 000 komwedhi. Itashi tsu kumwe aantu ya popye kutya onda futwa andola nomuyalu ngoka. Ondiikuthamo mongundu yaalongekidhi molwaashoka oshikumungu shoka osha shituka opolotika. Oya pula opo andola Ongundu yoAll People's Party (APP) yi kwatele komeho oshikumungu shoka, ngame inandi hala okukala oshitopolwa shiinima mbyoka," Maketo ta lombwele oNamibian Sun moRundu.
Maketo okwa popi kutya okwa ulikwa oshikando shotango mo-2010 opo a ninge omukomeho gwelelo lyoNampa ihe oshikako she osha hulu omweedhi ngoka gwa piti ihe okwa ulikululwa.
Amushanga gwoKabinete George Simataa okwa tindi okupopya sha kombinga yoshikumungu shika molwaashoka aniwa okuli mefudho. Aakalimo yamwe moKavango oya popi kutya Kapofi okwa pula aalongekidhi yehololomadhilaadhilo ndyoka opo kaya pule komeho nehololomadhilaadhilo mepingakanitho lyomahala giilonga mepangelo.
"Onda yi ko uunake hoka? Oompito dhini nda uvanekele aantu? Ondi na oonkondo dhini opo ndi ninge ngaaka?" Kapofi a pula sho aningilwa omapulaapulo koshifokundaneki shika.
"Lombwela ndje kutya olye ekulombwele ngaaka, nongele ino hala nena ino dhengelandje we. Ngame onda dhengele owala Mbambo tandi mu pula kombinga yoompangela dhoka ngame nda lesha miikundaneki na okwa lombwelendje kutya ke na ontseyo yasha kombinga yoompangela dhoka."
Omupresidende gwoAPP, Ignatius Shoxwameni ina vula okumonika, opo a ningilwe omapulaapulo.
Lyopokati mpoka, okomitiye ompe yelongekidho lyehololomadhilaadhilo ndyoka oya popi okupitila momupopiliko gwawo Mathew Singambwe, kutya aahololimadhilaadhilo itaya ka ninga omainda moondjila ngaashi sha lopotwa.
Okwa popi kutya yo aantu owala mboka ya loloka na oya hala omaupyakadhi gawo ga kandulwepo momukalo gwombili.
"Shika ka shi shi oshikumungu shopapolotika nenge andola shopaukwamuhoko ihe oshinima shaakalimo ayehe yomoKavango."
ELVIS MURARANGANDA