Nakusa Hennock ‘Skinny’ Hilundwa okwa li a pumbwa okukala nopoosa onene mepangelo yi vulithe ndjoka yuupeha mayola gwondoolopa ndjoka a kala nayo mondoolopa yaShakati.
Minista nale gwOmauyelele nOmakwatathano goPautekinika, Joel Kaapanda okwa popi ngaaka pethimbo a popitha aalilisa poshituthifumviko shaHilundwa, shoka sha ningilwa mOshakati, Olyomakaya ngaka ga piti.
Ominista nale yIikamina nIikwankondo Isak Katali , naye okwa koleke oohapu dhaKaapanda.
Aanapolotika mboka yaali oya popi kutya nakusa okuli ependafule ndyoka lya kutha ombinga miinyangadhalwa yopapolotika ya yooloka pethimbo lyekondjelomanguluko lyoshilongo.
"Okwa li gumwe gwomaakomeho pethimbo kwa totwa oSwapo sigo osho oshilongo sha manguluka," Kaapanda ta ti.
Kaapanda okwa holola okuuva nayi kwe sho Hilundwa ina mona opoosa yasha yopombanda mepangelo sigo osho a hulitha.
Hilundwa okwa hogololwa onga omuleli gwopashigwana mOnooli yaNamibia kuyele moomvula dho-1970 naKaapanda okwa popi kutya okwa longo pethimbo mpoka onkalo yombili moshilongo yi li mehalakano, pethimbo lyomamonitho giihuna nomadhengo ngoka ga ningilwa Aanamibia pethimbo lyuukoloni.
Hilundwa okwa valwa momasiku 30 gaMei, 1933 mOndangwa mOshitopolwa shaShana.
Okwa hiti osikola moSt Mary's Mission High School mOdibo mOshitopolwa shaHangwena omanga ina ka longa kondhalate moTsumeb, Ombaye nOvenduka.
Omolwa ekuthombinga lye miikwapolotika, Hilundwa okwa kuthwako kuushimba na okwa etwa mOnooli yoshilongo moka a tsikile nokulonga onga omuhwahwameki gwoSwapo.
Okwa tulwa miipandeko, okwa dhengwa nokumonithwa iihuna ketanga lyaakwiita yepangelo lyokatongotongo.
Hilundwa okwa longo onga omupeha mayola gwaShakati mo-2007 sigo 2009.
Katrina Shimbulu, ngoka a li mayola pethimbo a li omupeha mayola okwa popi kutya, nakusa okwa li omugandjimayele omuwanawa.
"Otandi hokolola kutya okwa li omugandjimayele omuwanawa, omugandjigwondjokonona, omulongi nuudhiginini," Shumbulu ta ti
Hilundwa okwa hulitha kuuvu wokankera mOshipangelo shaWindhoek Central Hospital Osoondaha ya pitile.
Okwa thigako oyana yaheyali, aatekulu 18 oshowo aatekulululwa 17.
NAMPA
Category: