Omukomeho gwopolisi yaNamibia, Sebastian Ndeitunga, okwa popi kutya otaka ekelahi omapopyo kehe ngoka taga ningwa kutya epangelo lyaNamibia inali itulamo mokukondjitha uukongo mboka waali paveta nokugamenenapo iiyamakuti moshilongo.
“Okabinete oka gandja iikwathitho mekondjitho lyiimbuluma mbyoka naashoka oshi li oshinakugwanithwa shi na ondilo noonkondo,” Ndeitunga ta ti.
Ndeitunga okwa popi kutya otashi ulike kutya iimbuluma mbyoka yuukongo womayego goondjamba noompanda otayi ningwa kaantu ye yilongekidha nawa na oshi li iimbuluma ya longekidhwa.
“Omadhidhiliko agehe otaga ulike kutya ongeshefa ndjoka otayi ende nawa muAsia naashoka sha etitha ndi pule opolisi yAsia yi tupe omauyelele goDNA uuna ya kwata ko omayego goondjamba opo tu mone kutya iiyamakuti mbyoka oya zilila peni. Ngele nena oongangala otadhi longele kumwe natse aapolisi otu na okukala tu na ekwatathano. Ndyoka olyo etumwalaka lyandje,” Ndeitunga ta ti.
Ndeitunga okwa popi kutya nonando okwa pula eyambidhidho okuza koombushe miilonga moAsia inashi etitha elongelokumwe ndyoka a hala.
Okwa popi kutya okwa kundathana oshikumungu shoka nAmushanga-Ndjai gwoInterpol, Jürgen Stock, opo shi ta tulwe miikundathanwa yomutumba omuti-84 gwoInterpol ngoka gwa ningilwa moRwanda muNovemba.
“Osha kundathanwa nawa momutumba ngoka na okwa ningwa uutokolitho. Okupopya oshili epangelo lyetu otali longo nuudhiginini nokuninga shoka sha pumbwa okuningwa.”
Okwa monika kutya aazaizai otaya longitha aakwashigwana mokugwanithwa po iilonga yawo mbyoka yuungangala.
Ndeitunga okwa popi kutya mboka taya longo iimbuluma mbyoka oyiilongekidha nawa na otashi ulike kutya ope na woo ekwatathano okuza meni.
Komufala Ndahangwapo Kashihakumwa ngoka a li omukomeho gwotango gwomatanga ngoka ga nuninwa okukondjitha uukongo mboka mOshikunino shIinamwenyo mEtosha, okwa popi kutya inaku monika natango kutya olye omutse omunene melyenge ndyoka.
Okwa popi kutya pethimbo a longo onga omukomeho gwomatanga ngoka, ongundu ye yaakonaakono oya mono po owala kutya ope na omalyenge ga thika pu gane ngoka taga kwatele komeho iimbuluma mbyoka ya longekidhwa.
Kashihakumwa okwa popi kutya omalyenge ngoka ga homata oondjembo dhuukongo otaga longele okuzilila mOnamatanga, Uutsathima, Iitapa nOtjenova.
Gumwe gwomaafekelwa okwa li a fala aanambelewa yopolisi mpoka a holeka ondjembo ye .
Oye na iilongitho ayihe ya gwanapo mokulonga iimbuluma yawo mbyoka
Kashihakumwa okwa popi kutya okwa dhidhilika kutya oonakulonga iimbuluma mbyoka otaya kwatelwa komeho kaantu ya dheulwa nawa okuza mUuministeli wOmidhingoloko nOmatalelepo nenge pamwe okuza momahangano gamwe gopaumwene.
“Oye na ontseyo yegameno molwaashoka oya kotoka nawa na otaya longo iilonga yawo nuukeka. Shiikwatelela komakonaakono getu, aantu mboka otashi vulika ye na ekwatathano naaniilonga yoMET.”
Oyendji yomwaamboka ya tulwa miipandeko pethimbo Kashihakumwa a kwatele komeho omatanga ngoka mEtosha, aanyasha yoomvula dhili po-19 sigo 32, yamwe aanashilonga yamwe ihaya longo. Gumwe gwomwaamboka ya tulwa miipandeko okwa li omupeha omukomeho mUuministeli wIilonga nOmalweendo mOshitopolwa shErongo, gumwe okwa li omunambelewa gwopolisi mOvenduka omanga omukwawo omulongiskola mOshitopolwa shaMusati. Omuniilonga nale moMET naye okwa tulwa miipandeko.
Kashihakumwa okwa popi kutya konima sho ya tameke iilonga yawo oya mono kutya egameno mEtosha inali kwata miiti ngaashi andola sha li shi na okukala. Okwa ti oomvula dhimwe egameno lyehala ndyoka olya kala kohi yaanambelewa aakuluntu mEtosha momwene ihe kashi shi okuzilila kuuministeli.
Okwa popi kutya pethimbo a kwatele komeho omatanga ngoka uule woomwedhi ashike ndatu, pokati kaJuni naAugust inaku lopotwa uukongo washa na oshe ya kutha owala omasiku 14 opo ya tule miipandeko omufekelwa gwawo gotango.
CATHERINE SASMAN
Category: