Yamwe yomaanaskola mboka ya shanga ondondo onti-10 oya pewa eyambidhidho miilongwa ngaashi Omwaalu, Physical Science, oKeyboard and Word Processing examinations, uuministeli wati.
Uuministeli wElongo inawu yalula nokutaambako iizemo yaanaskola o-82 mboka ya shanga ekonaakono lyo-10 molwaashoka otaku fekelwa kutya oya yaka ekonaakono na otaku ningwa omakonaakono.
Sho a ningwa naye oonkundathana koshifokundaneki shoNamibia Sun, Cavin Nyambe ngoka eli Omukomeho gwomakonaakono okwa popi kutya ita vulu okuholola kutya ooskola dhini po dhi na aanaskola ya yaka omakonaakono.
Nyambe okwa popi kutya ita vulu okugandja uuyelele waanaskola, ooskola nenge iitopolwa molwaashoka omakonaakono inaga pwa natango.
Sho a pulwa kutya otaya fekele ngiini kutya aanaskola mboka oya yaka ekonaakono, Nyambe okwa popi kutya otaku fekelwa kutya oya yaka molwaashoka oya shanga omayamukulo gawo taye ga dhimi po yo taye ga shanga ishewe.
Uuministeli owa tseyithilwa omafekelo ngoka pethimbo kwa talwa omakonaakono ngoka na otashi ulike kutya aanaskola mboka otashi vulika ya mono omayambidhidho miilongwa ngaashi Omwaalu, Physical Science and Keyboard and Word Processing.
Eyako lyomakonaakono kali shi oshinima oshipe kuuministeli mboka konima sho aanaskola ya thika po-373 ya fekelwa kutya oya yaka ekonaakono lyokomumvo lyondondo onti-12 mo-2012.
Aanaskola mboka okwa fekelwa ya mono oombapila dhomapulo miilongwa ngaashi Biology, English Second Language, Agriculture, Business Studies, Economics, noDevelopment Studies.
Aanaskola ya thika po-272 ya za mOshitopolwa shaZambezi oya fekelewa meyako lyekonaakono, omanga moKhomas (84), Omusati (4), Kavango (4), Oshana (3), Omaheke (3) Ohangwena (2) nErongo (1).
Sha landula omakonaakono ngoka ga ningwa iizemo yaanaskola 23, oya ekelwahi na oya indikwa okushanga ekonaakono uule womvula yimwe. Ombaapila dhomapulo odha yakwa komuniilonga nale gwoNational Institute for Educational Development (NIED), Prisca Manga Wakumelo.
GORDON JOSEPH