Joseph Diescho okwa popi kutya ye natango oha longele oshiputudhilo shoka molwaashoka ita tsu kumwe nomulandu gwetopoko lye noshiputudhilo shoka a kala ta longele. Diescho okwa popi kutya okwa tidhwa pauyelele mboka wa pewa oshigwana oshiwike sha piti, ye natango ota tsikile nokukala tayi kiilonga sigo a tidhwa pamulandu.
Diescho okwa popi ngaaka konima owala sho opolisi ye mu indike opo kaye mombelewa ye moNipam sha landula elombwelo lyomunashipundi gwoshiputudhilo shoka na okuli Amushanga gwoKabinete George Simataa.
Simataa okwa tseyitha oshiwike sha piti kutya Nipam oya adha etsokumwe naDiescho opo ya topoke nomunambelewa ngoka otaka pewa oshimaliwa shoomiliyona 3.6 nonando etsokumwe ndyoka lyetopoko inali shainwa.
“Ina tu topoka molwaashoka etsokumwe ndyoka lyokuhulitha po iilonga yandje naNipam inali shainwa koombinga adhihe onkene pampango ngame natango omuniilonga gwa Nipam na otandi landula owala ompango,” Diescho ta ti.
“Ina tu tsa kumwe molwaashoka mombapila ndjoka ya tuminwa komukalelipo gwandje gwopaveta oya holola kutya natango otwa pumbwa okuya moonkundathana.”
Diescho okwa popi kutya ye ota landula owala omilandu molwaashoka okuli omukwashigwana e na elandulathano.
Simataa okwa yamukula kutya Diescho naye molwaashoka okwa zimine etsokumwe ndyoka pae-mail.
“Ngele nani ina tsa kumwe netsokumwe ndyoka na natango ota loongele Nipam, mupuleni kutya omolwashike ineya kiilonga oshiwike sha piti, ota vulu okugandja omukanda gwefudho, mupuleni ngaaka,” Simataa ta ti.
“Okwa yamukula kepulo lyetu opo tu topoke naye na zimine okupitila momukalelipo gwe gwopaveta.”
Simataa okwa popi Diescho ita longele we oNipam nonando kape na omukanda gwa sha oya tsu kumwe na otaya longekidha oku mu pa iimaliwa ye okuya pehulilo lyoshiwike twa taalela. Omukomeho gwOpolisi yaNamibia, Sebastian Ndeitunga okwa popi kutya aanambelewa yopolisi mboka ya indike Diescho opo a ye mombelewa ye oomboka haya longele pombelewa dhoka na inaya tulwa po owala sho kwa hololwa oshikumungu shoka.
“Otwa popi naDiescho pambili kutya otwa pewa elombwelo kuSimataa opo ka pitikwe a ye moombelewa dhoka molwaashoka iha longo mo we na okwa itaala eta shuna,” Ndeitunga ta ti.
Diescho ngoka e li omushangi gwiinyolwa na okuli omutseyinawa gwopolotika okwa tidhwa kelelo lyaNipam omolwa aniwa okuya pondje oompango dhoshiputudhilo shoka, okwaahafuta iifuta ye oshowo okulongitha pambambo omauwanawa ngoka a pewa komugandji gwe gwiilonga.
Oonzo dhimwe odha popi kutya Diescho okwa tongolwa omolwa iinyolwa ye mbyoka ha shanga miikundaneki tayi nyana epangelo. Oshikumungu shoka osha etitha opo aaleli yo pamuthigululwakalo mIitopolwa ayihe yaKavango, hoka kwa za Diescho ya pule aalelwa yawo ya ninge ehololomadhilaadhilo itaya popile etidho lyaDiescho.
Omupresidende Hage Geingob pethimbo lyomutumba ngoka aningi niikundaneki petameko lyoshiwike shika okwa popi kutya ke na ontseyo nuuyelele woompangela dhoka tadhi ningwa mIitopolwa yaKavango.
Lyopokati mpoka, Ewawa lyAanyasha mOngundu yoSwapo moRundu oya ikaleke kokule nehololomadhilaadhilo ndyoka tali pangelwa okuningwa na olya pula iilyo yawo opo kayi kuthe ombinga mehololomadhilaadhilo ndyoka.
ELVIS MURARANGANDA
Category: