Konima sho epangelo lya tseyitha kutya elongo lyoomoosekundoskola otali kala lyoshali okutameka omvula twa taalela, oNamibian Sun oya nothwelwako kaavali kutya ooskola dhimwe otadhi tindi okushunitha iifuta mbyoka ya futwa kaavali ongaa oofuto dhoskola.
Aavali yamwe oya lombwelwa aniwa kutya iifuta mbyoka ya futile andola oyana ya nuninwa omvula yo-2016 otayi ningi iifuta yokwiiyamba tayi futwa kaavali ayehe.
Shoka itashi popilwa kUuministeli wElongo mboka wa tseyitha kutya iifuta ayihe mbyoka ya futwa kaavali naatekuli yaanona ya nuninwa omvula yo-2016 nayi shunithwe kaavali, molwaashoka elongo lyoondondo dhopombanda moshilongo nalyo otali kala lyoshali.
Omupopiliko gwUuministeli wElongo, Johanna Absalom okwa popi kutya omalongekidho naga ningwe nooskola opo iimaliwa mbyoka yi shunithwe kaavali.
“Ngaashi pelombwelo lya ningwa kuuministeli momweedhi Septemba nuumvo, otaku tulwa miilonga elongo lyoshali mooskola adhihe naavali itaya ka futa we oofuto dhoskola oshowo omakonaakono gondondo 10 no-12.”
Nonando ongaaka itashi ti kutya aavali itaya ka gandja we omakwatho kooskola pamukalo gokwiiyamba.
Absalom okwa popi kutya, aavali mboka ya hala okugandja omakwatho kooskola otaya taambiwako nomaako agehe.
Aavali otaya vulu okugandja omakwatho pamukalo gwiimaliwa, iikwathitholongo, iikulya, iizalomwa oshowo kehe tuu shoka tashi pumbiwa kaanona.
Absalom okwaa popi kutya iifuta yomihandjo opo tayi kala.
Epangelo lyaNamibia olya tokola okukutha po iifuta yooskola moondondo dhopombanda okutameka omvula twa taalela.
Etokolo ndyoka otali utha kutya iifuta mooskola dhepangelo itayi kalapo kakele mooskola dhopaumwene moka aavali taya ka tegelewa nokukala taya futu iifuta yooskola ngaashi sha kala.
Oshimaliwa shoomiliyona 30 oshiikalekelwa sha nuninwa etulo miilonga lyetokolo ndyoka momumvo gwoshimaliwa gwo-2015/16 omanga oshimaliwa shoomiliyona 120 tashi kiikalekelwa momvula gwo-2016/17.
ELVIS MURARANGANDA
Category: