Omupresidende Hage Geingob, okwa yanda okuyamukula omapulo kombinga yonkalo yoshimaliwa moka mu na oshilongo, ondjambi ye naandjoka yaagandjimayele ye oshowo omanyenyeto ngoka taga zilile mOshitopolwa shaKavango.
Pehala lyokuyamukula omapulo ngoka a pulwa, Geingob okwa ponokele iikundaneki mbyoka aniwa tayi shanga omahokololo geli ompinge naye.
Pethimbo lyoonkundathana dhoka dha ulikwa koradio yomuzizimbe, Geingob okwa uvika ta yamukula aatoolinkundana kehe komapulo ta pulwa kutya ‘kandi shi shi’ nenge ‘inandi uva sha’.
Geingob, ngoka a li aningwa naye oonkundathana koshikundaneki shoBBC omasiku ga piti, okwa ithana omutumba gwiikundaneki kegumbo lyepangelo opo a gandje uuyelele nomayamukulo kombinga yekalo lye mombelewa monena okuza nkene a pewa oshinakugwanithwa shokulela oshilongo.
Geingob okwa popi kutya ye okuholike kaantu konima sho a pulwa kutya ope na omaiyuvo kutya epangelo lye otali ndopeke oshigwana.
Okwa yanda okuyamukula omapulo gamwe kombinga egwedhelo lyiimaliwa mbyoka hayi longithwa kepangelo nonando okwa gandjwa omagwedhelepo kOminista yEmona Calle Schlettwein, opo kushunithwe pevi omuyalu gwiimaliwa mbyoka hayi longithwa kepangelo.
“Kombinga yondjambi kandi shi shi omolwashike itamu yi kombelewa opo mu kapule omauyelele ngoka, kage shi oshiholekwa,” Geingob ta ti.
“Ngame kandi shi nondjambi yandje. Eeno oomiliyona dhoka mwa popi otandi dhi pula molwaashoka omwa ti ohandi mono oomiliyona 2 nena epangelo olya pumbwa okufutandje iimaliwa mbyoka molwaashoka kashi li pauyuuki kungame. Otandi pandula iikundaneki sho ya pendje omuyalu ngoka ngame ihandi futwa, otandi yi kompangu.”
Sho apulwa kombinga yomakonaakono gelando lyoAreva koUraMin, mpoka Geingob a li oshitopolwa mo-2007 okwa yamukula kutya okwa hala okupewa uuyelele kombinga yoAreva molwaashoka keshi kutya oshike.
Geingob okwa popi kutya okwa li omuniilonga gwoUraMin ndjoka ya landithwapo kepingakanitho lyomaliko.
Sho a pulwa ngele epangelo otali landa po ondoolopa yaKombat okuza komunangeshefa Knowledge Katti, okwa yamukula kutya: “Ndjoka ongeshefa yaKatti. Aluhe ohamu kambadhala okutula mumwe Katti naGeingob. Ngame kandi shi oshikumungu shaKombata na kashi shi ongeshefa yandje, pamwe omalelo goondoolopa otaga vulu okuyamukula.”
Sho apulwa kutya epangelo otali longitha iimaliwa ingapi yoshigwana mokufuta aaniilonga yepangelo, Geingob okwa yamukula kutya nashi kale sha tseyika kutya iifuta mbyoka oya kwatela mo okufuta aakwaita nopolisi oshowo iilonga ayihe.
“Taleni kuNigeria nenge South Afrika mboka yena omapangelo gopokati gena oominista naapeha yawo ihe omapangelo gopaitopolwa nago oge na oongoloneya, okabinete oshowo opaliamende, mboka ohaya longitha iimaliwa oyindji.”
“Omuyalu ngoka hagu longithwa kuNamibia oguli oopresenda 40 dhiilongomwa yomoshilongo. Tse oshilongo oshishona ihe otu na ondjokonona ya yoolola, onkene otu na okutunga oshilongo.”
“Otatu tungu oshilongo, ope na ondando ya kehe shimwe. Katu na ontseyo yomuyalu ngoka tatu longitha ihe natse otu na woo omaipulo. Otatu shunitha pevi omuyalu gwiimaliwa mbyoka tayi longithwa sho tatu pula komeho.”
Omuleli okwa zimine kutya epangelo lye olya ndopa mokukwashilipaleka kutya oominista odha shaina omatsokumwe gegwanithepo lyiilonga. Geingob okwa pula omukomeho gwe gwiilonga Etienne Maritz, opo omatsokumwe ngoka ga kale ga manithwa nena.
Maritz okwa yamukula kutya omuntu ngoka e na oshinakugwanithwa shokukwashilipaleka kutya omatsokumwe ngoka oga manithwa, okuli mefudho.
ELVIS MURARANGANDA
Category: