Konyala aanona ya thika po-400 mboka ya valelwa muupongekwa pethimbo lyekondjeomanguluko oya tululwa moBrakwater mOnooli yaVenduka mOlyomakaya ga piti, hoka oko taya ka tegelela iikondo yepangelo yi yape iilonga.
Aanona mboka yeli moongundu mbali, yimwe oyali meni omanga yimwe ya li oshinano shoometa oonshona okuza pOombelewa Oonene dhOngundu yoSwapo mOvenduka oya falwa kehala hoka noombesa dhamuni gwaVenduka oshowo oololi.
Sho Oshifokundneki shoNamibian Sun sha talelepo ehala lyawo ndyoka epe, nakulwa omukulu na okuli omukwaita nale gwo People’s Liberation Army of Namibia (PLAN), Nicodemus Kamati, okwa popi kutya ongundu ndjoka otayi kala hoka sigo ya pewa iilonga ngaashi ya uvanekelwa kepangelo.
Kamati okwa popi kutya iikondo yepangelo ya yooloka otayi ka ninga iigongi opo yi kundathane kombinga yoompito dhiilonga dhoka tadhi vulu okumonena aanyasha mboka miikondo moka.
Okwa popi kutya omolwa omaiyuvo goshigwana ngoka aluhe ga kala kutya aanona mboka oya nika oshiponga, okwa yi moonkundathana nayo nokupopya nayo paumwene onga he yawo opo a mone uuyelele kutya oya hala shike na okwa mono kutya aanona mboka oya pumbwa omayele nkene ye na okuyambulapo oonkalamwenyo dhawo.
Kamati okwa popi kutya oshikumungu shomauyelele ngoka amono okwe shi gandja momake gAmushanga-Ndjai gwoSwapo, Nangolo Mbumba ngoka a pulakene nokonima yomasiku okwa ningwa omutumba pokati kaakalelipo yoongundu dhoka oshowo oSwapo na okwa adhika etsokumwe.
“Otwa mono kutya aanona mboka inaya nika oshiponga ihe oye na oompangela oombwaanawa na oya pumbwa owala omayele molwaashoka yamwe oya hala okushuna kooskola nokumona oonzapo dhoka tadhi ya monitha iilonga iihwepo,” Kamati ta ti.
Okwa popi kutya Mbumba okwa uvaneke kutya otaka fala oshikumungu shoka momuntumba gwelelo lyongundu, shoka aningi na osha etitha opo ehangano lyoKalahari Holdings li kuthepo oshinakugwanithwa shokukongela aanona mboka ehala lyokukala omanga Uuministeli wOmaudhano, Aanyasha nOmayakulo goPashigwana wa pewa oshinakugwanithwa shokuya fala kehala lyawo ndyoka epe.
Kamati okwa popi kutya etulululo ndyoka olya ningwa pambili na inaku pumbwa eidhopomo lyopolisi.
“Otwa ningi etulululo ndyoka pambili pwaahena ekwathelo lyopolisi. Aanona mboka aanambili.”
Monena aanona mboka natango otaya zi mootenda ihe oye uundjugo oshowo omeya ga yogoka na ope na oompangela opo ya pewe olusheno. Kamati okwa popi kutya inaku ningwa omalongekidho giikulya, ihe aanona mboka oye na omukumo kutya epangelo otali ya kwathele.
KENYA KAMBOWE
Category: