Okwa tukuka woo omapopyo kutya Diescho okwa tidhwa molwaashoka ota ndopa okugwanithwa po omilandu noompango dhoshiputudhilo shoka shepangelo oshowo okukala ita futu iifuta ye.
Diescho okwa lopotwa kutya otaka pewa kehangano ndyoka oshimaliwa sha thika poomiliyona 3.6 nomikuli dhoka e na otadhi ka kuthwa miimaliwa mbyoka.
Diescho otaka futa Nipam, Elelo lyaVenduka oshowo Ombelewa yOmupilima Minista omolwa oongunga dhaantu dhoka e na.
Nipam okwa ekelehi woo omapopyo kutya etidho lyaDiescho oli li okatongo.
Omunambelewa ngoka nale omukuluntu okwa tidhwa mEtiyali lyoshiwike sha piti, omolwa aniwa oshinyolwa she shokoshiwike kehe shoka hashi piti mOshifokundaneki shoNew Era.
Iinyolwa ye mbyoka oya kala aniwa nokunyana epangelo momikalo dha yooloka ihe nonando ongaaka Omunashipundi gwoNipam, na okuli amushanga gwoKabinete George Simataa, okwa popi kutya iinyolwa mbyoka yaDiescho hayo ya etitha etidho lye.
Okwa popi kutya Diescho okwa teya okondalaka ye yiilonga naNipam.
"Elelo lyoshiputudhilo olya popi kombinga yiinyolwa yaDiescho poompito dhilwe ihe iinyolwa ye mbyoka inayi kundathanwa pethimbo lyandje. Ondi wete kutya osha li sha kundathanwa na okwa li a pulwa opo a hulithepo okushanga iinyolwa yoludhi ndoka onkene kandi wete omatompelo gokushi ninga natango," Simataa a yelitha.
Pahapu dhaSimataa, Diescho okwa kala ta longo iilonga yopondje niiputudhilo ngaashi Namport mbyoka yili medhigathano lyiilonga nomugandji gwe gwiilonga.
"
Nonando Simataa okwa popi kutya ehulithepo lyokondalaka yiilonga yaDiescho olya zi koombinga adhihe ina yelitha kutya omolwashike Diescho a tindi okukala momutumba ngoka gwa tokola etidho lye.
"Otwe mu hiya nangame mwene onda popi naye oshowo iilyo ayihe na otwe mu lombwele kutya otwa tokola okuya moonkundathana dhehulithepo lyokondalaka ye ihe okwa kadhengela amushanga lyopotundi 00:00 nenge 01:00 ta popi kutya ita kutha we ombinga momutumba ngoka."
Simataa okwa popi kutya eeto moshilongo lyaDiescho okuza koSouth Afrika sho a tameke iilonga naNipam mo-2013, okwa tsuwa kumwe kutya oshiputudhilo otashi mu kongele omulalo nenge ehala lyokukala, ihe Diescho okuna okukala ta futu yemwene omeya, olusheno oshowo omayakulo galwe yamuni.
"Pethimbo ndyoka ka pwali ehala lyokukala lyaNipam onkene Diescho okwa kala hazi moSafari Hotel okutameka June 30, 2013 sigo September 30, 2013.”
Simataa okwa popi kutya Nipam okwa futu ohotela ndjoka oshimaliwa sha thika po-N$140 443 nokonima oshiputudhilo shoka osha zimine opo shi hiile egumbo mOlympia na osha kala tashi futu oshimaliwa shooN$32 500 komwedhi.
"Omupya omunene Diescho ina kaza megumbo ndyoka nonando Nipam okwa futu odeposita yegumbo ndyoka."
"Okwa ka tokolwa nee kuNipam nOmbelewa yOmupilima Minista opo Diescho a kale tazi momagumbo gepangelo moEros."
Diescho aniwa okwa ndopa okufuta omayakulo gamuni ngoka monena oondjo dhamuni dhoka e na dha thikama poo-N$ 258 549.
Aniwa natango okwa ndopa okufuta ohiila yooN$4 500 komwedhi noondjo dhOmbelewa yOmupilima Minista dhoka e na odhili poo-N$108 000.”
Simataa okwa popi kutya Diescho okwa li a popiwa naye kombinga yiifuta mbyoka ihe oohapu dhoka odha gwile momakutsi ga thita.
Diescho okwa tindi okupopya kombinga yoshikumungu shoka.
ELVIS MURARANGANDA