Ondoolopa yokomunkulofuta gwaMbaye natango oya dhengwa ishewe konkalo yenkanka lyaaniilonga sho aaniilonga yalwe ya tokola ishewe okuya mekanka lya landula ndyoka tali ningwa nale kaalongi yomomeya.
Aaniilonga yehangano lyoNamibia Stevedoring Services nayo oya tokola okuya mekanka taya pula opo ya kale taya futwa oshimaliwa shooN$18 mowili lyo ehangano ndyoka tali gwedhele woo uuwanawa waaniilonga wopenzela.
Monena ehangano ndyoka ohali futu aaniilonga oshimaliwa shooN$7 mowili naaniilonga otaya pula ofuto ndjoka opo yi gwedhelwe sigo opooN$18.
Aaniilonga mboka oya popi kutya otaya ka hulitha po owala ekanka uuna ya gwedhelwa nooN$15 nuuna iifuta yawo otayi tamekele komwedhi Mei. Monena aaniilonga mboka ohaya gandja oshimaliwa shooN$100 momuntu kehe, shoka sha nuninwa openzela yawo.
Paulus Hango, ngoka e li omupresidende gwoNamibia Seamen and Allied Workers’ Union (Nasawu) na okuli omukalelipo gwaaniilonga yoNamibia Stevedoring Services, okwa popi kutya iimaliwa mbyoka tayi gwedhelwa onga iimaliwa yopenzela yaaniilonga iishona noonkondo.
"Oto vulu ngiini okuya moshipundi shevululuko nuumaliwa mboka uushona? Otatu kondjitha opo aaniilonga ya kale taya gandja ooN$250 komwedhi lyoehangano tali gandja ooN$250."
Okwa gwedha po kutya aaniilonga itaya pitika aagandji yiilonga ya kale taya ningi powala shoka ya hala okuninga.
"Oye na ko nasha owala okukala ye na iimaliwa moondjato dhawo ihe itaya tala konkalo yaaniilonga, otwa pumbwa okuhulitha po onkalo ndjoka," Hango ta ti.
Aaniilonga yoStevedoring oya ningi ehololomadhilaadhilo lyopambili muSeptemba taya pula opo onkalo yawo yiilonga yi hwepopalekwe.
"Aaniilonga yetu ohaya futwa iimaliwa yili pevi noonkondo okuyeleka nomahangano gaali goStevedoring. Otuna woo omaipulo kombinga yomulandu gwiilonga yaaniilonga mboka taya kalelele naamboka yopakathimbo."
Hango okwa popi kutya ehangano lyawo olya manguluka okuya moonkundathana.
"Otwa hala oonkundathana tadhi kala muuwanawa. Otwa landula omilandu adhihe opo ekanka ndika li kale li li pampango. Onkalo ndjoka aaniilonga yetu taya ihumbatelwa kayi shi ombwaanawa."
Ekanka ndyoka okwa tegelelwa li ka gumwe iilonga pomatulilo gaMbaye.
Ekanka ndyoka tali ningwa kaalongi yomomeya mOmbaye onkene tali tsikile konima sho lya kala iiwike yontumba monena.
LEANDREA LOUW