Ehangano lyaanangeshefa mondoolopa yaShikango tali ithanwa Oshikango Business Association (OBA) olya popi kutya etokolo ndyoka lya ningwa kOmbaanga yaNamibia (Bank of Namibia) BoN, pamwe nOmbaanga yaAngola (Banco Nacional de Angola) BNA opo ku kalekwe manga pakathimbo epingakanitho lyiimaliwa yaAngola otali gumu noonkondo ongeshefa yawo mOshikango. Sho ya popi noshifokundaneki shoNamibian Sun sha landula sho kwa ningwa etseyitho lyekaleko lyepingakanitho ndyoka tali kala miilonga sigo omasiku 21 gaDecemba, Omunashipundi gwoOBA, Raed Hijazi okwa popi kutya etseyitho ndyoka oli li ehalutho enene kuyo, na otali etitha ongeshefa yawo yi gwe pevi noonkondo mOshikango.
“Otwa tegelela ondjele yokwaahena iilonga yi londe pombanda omolwa etseyitho ndika,” Hijazita ti.
Pahapu dhaHijazi, etseyitho ndyoka olya ningwa pethimbo ewinayi mpoka aanangeshefa ya taalela iituthi yomatango omanene noongeshefa okwa tegelelwa andola yi kale yili nawa. “Aalandithi yomOshikango oya li ya tegelela andola omweedhi gwaDecember gu kale ehupitho kuyo unene sho ongeshefa yawo ya li itayi ende kashona petameko lyomvula,” Hijazi ta ti. Oombanga oonene dhiilongo mbika iyali, Namibia naAngola odha tseyitha moshiwike muka kutya otaya ka ninga omalunduluko gamwe opo ya thitike oomwaka dhoka dhili metsokumwe lyepingakanitho ndyoka. Omalunduluko omape ngoka taga ningwa otaga utha opo oBank of Namibia yi gandje iimaliwa yaNamibia koBanco Nacional de Angola, noBNA otayi ka kala tayi ningi omapingakanitho moombanga dhawo moSanta Clara. Sha hala okutya Aanamibia mboka ya hala okuninga omapingakanitho giimaliwa yaAngola miimaliwa yaNamibia otaye ke shi ningilwa moombanga dhaAngola. Hijazi okwa popi kutya ekaleko ndyoka inali gandja ompito kaakwashigwana yaAngola mboka taya ka kala ya hala okulanda iinima yawo mOshikango pokati komasiku ga-2 sigo 21 gaDecemba. “Otu na omalimbililo kutya omalandulathano ngoka omape otaga ka kala ge na uupyakadhi nge tashi ya komalanditho. Epingakanitho lyiimaliwa mbyoka otali ka hulapo,” Hijazi ta ti. Ehangano ndyoka olya holola woo omaiyuvo gawo gonayi sho lya li lya gandja omagwedhelepo koBoN momasiku ga-5 gaAguste ihe omagwedhelepo ngoka inaga tulwa miilonga. Aanangeshefa oya popi kutya omagwedhelepo gawo inaga talika nonando oyo unene ya gumwa konkalo ndjoka. Hijazi okwa popi kutya BoN okwa pula okukala ta tula miilonga omagwedhelepo gawo molwaashoka oyo ye shi onkalo ndjoka ya taalela aanangeshefa. “Otu shi shi kutya oonkundathana ohadhi eta omatsokumwe okuza koombinga adhihe nomonkalo ndjika shika osho shali shina okuningwa.”
Omunashipundi gwEhangano lyAanangeshefa mOshitayi shomOnooli yOshilongo, Tomas Iindji okwa popi kutya muule wiiwike mbyoka iyali ongeshefa otayi kala ya gumwa nayi ketokolo ndyoka. Nonando ongaaka okwa popi kutya osha pumbiwa oombaanga dhoka mbali dhi gamenenepo epingakanitho lyiimaliwa opo ku hupithwe etsokumwe ndyoka nokuyambulapo iipindi pokati kiilongo mbika iyali. “Otatu tsikile nokupula BoN opo a kwashilipaleke kutya uuwanawa wiilyo yoNCCI oshowo aanangeshefa ayehe owa simanekwa uuna taya ningi oonkundathana dhawo nOombaanga yaAngola,” Iindji ta ti.
MERJA IILEKA
Category: