Onkundana yeso lye oya kolekwa kOmukuluntu gwOpolisi yaNamibia Sebastian Ndeitunga, ngoka apopi kutya Mbako-Angula omunamimvo 42 okwa ngambuka na okwa falwa meendelelo koshipangelo hoka a hulithile lyopotundi 23:00
"Otashi uvitha nayi okukanithila oshilyo shoka sha li metumo lyiilonga yopashigwana yokukalekapo ombili miilongo," Ndeitunga ta ti.
Omatanga gwIigwana yaHangana gokukalekapo ombili moLiberia oga tumwa moshilongo shoka muSepetemba gwo-2003, opo ga kalekepo elandulathano sha landula etsokumwe ndyoka lya tulwa miilonga moshilongo moka sho omuleli gwoshilongo Charles Taylor a zi koshipundi.
Etumo ndyoka olya landula iita yopashigwana iitiyali yaLiberia, naMbako-Angula okwa li oshitopolwa shomatanga gaakwiita ya thika po-15 000 oshowo aanambelewa yopolisi 1 100 mboka ya tumwa koshilongo shoka.
“ Mbako-Angula okwa li metumo lyiilonga ngaashi wala yakwawo yalwe mboka ya yi pamwe naye metumo ndyoka. Okwa li e na okumanitha etumo lye nokugalukila kegumbo," Ndeitunga ta ti.
Okwa gwedhapo kutya omulandu gwetumo otagu utha opo aanambelewa yopolisi ya kale metumo lyIigwana yaHangana uule woomwedhi 12 ihe etumo lyawo ohali lelepekwa uuna kwa ningwa eindilo kIigwana yaHangana.
"Okwa kala metumo ndyoka uule woomvula mbali molwaashoka ekalo lye koshilongo hoka olya li lya lelepekwa omolwa iilonga ye iiwanawa mbyoka a longo."
Omugandjimayele gwomupresidende komayambulepo goshigwana na okuli hekulu yanakusa, Jeff Mbako okwa popi kutya oye li moluhodhi olwa eso lya Mbako-Angula na kaye na natango uuyelele kutya omudhimba gwe otagu etwa uunake moshilongo.
"Oshilukadhina she osha li 'Peacemaker' nedhina ndyoka olya popi oshindji kombinga ye. Okwa li omuntu omunambili ngoka aluhe ha yanda oontamanana. Okwa li metumo lyombili ndyoka lya holola ombinga onene yuukwatya we," Mbako ta ti
Mbako okwa dhigako oyana yatatu, aakadhona yaali nomumati gumwe.
ELVIS MURARANGANDA