Ominista yUuthikepamwe nOnkalonawa yAanona Doreen Sioka okwa pula onkalo ndjoka opo yi tulwe miilonga pethimbo kwa patululwa pambelewa omahwahwameko gUulewomasiku 16, ganuninwa okukondjitha Omiyonena dhomOmagumbo.
"Pamuthigululwakalo gwetu aalumentu ohaya hokana aakiintu ye vulithe pugumwe ihe ihatu idhipaga. Nonando oho kala omukodhi oho vulu okumona omunhu ngoka e ku simaneka," minista tati.
Sioka okwa popi kutya olugodhi lwokukondjitha omiyonena dhomomagumbo oshowo omadhipagathano oludhigu noonkondo na okwa nyana mboka haya itaala kutya uuna ya yi miihulo naantu yontumba opo taya ningi aakengeli.
"Omolwashike wu na okuya miihulo nomumoye. Oshikwashike shoka? Ope na sha sha puka. Ngele owa hala okuninga omukengeli ito vulu okuninga omukengeli momukalo guli ngaaka."
Omadhipagathano ngoka taga ningilwathana kaaholathani moNamibia oga londa pom anda noonkondo, unene aakiintu taya dhipagwa kaalumentu mboka ye li nayo momakwatathano gopahole.
Otashi uvithandje nayi okumona aakiintu ya lala momakunku gombinzi onga moshilongo mu na iita. Ohole ihayi ehameke ihe oya pumbwa okugamena," Sioka ta ti.
Minista okwa pula oshigwana pamwe noongeleka dhi longele kumwe mokukondjitha omiyonena dhoka.
"Ohandi ipula kutya ooskola dhoSoondaha hoka aanona yali haya longwa esimaneko, evuliko nohole odha ningine peni," Sioka a pula.
Omukomeho gwoLifeline/ Childline Anna Matebele okwa popi kutya omiyonena dhoka odha pumbwa okuuvikako kaantu mboka taye dhi kondjitha.
“Omiyonena dhoka otadhi etithwa komakwatathano ngoka gaana ombili. Omiyonena otadhi etithwa konkalo yoonkondo nokwaahathikepamwe. Omiyonena odhili oshikumungu shoka sha dhingolokwa kemweno nohoni. Opo tu vule okugandja ekwatho kaantu otwa pumbwa okuuvako nkene tu na okukondjitha omiyonena dhoka."
Omahwahwameko ngoka guule womasiku 16 ga nuninwa okukondjitha omiyonena dhoka tadhi ningilwa aakiintu naanona yaakadhona.
Omahwahwameko ngoka otaga yi sigo okomasiku 10 gaDesemba moka hamu dhimbulukiwa Esiku lyUuthemba wOmuntu.
Omahwahwameko ngoka otaga ningwa kohi yoshipalanyolo
‘Peace in the home to peace in Namibia: Unite to end violence against women and children’.
JEMIMA BEUKES