Gumwe gomufekelwa moshipotha shomuyeka kwahomatiwa ngoka gwa ningilwa osasiyona yomahooli yoTotal Service Station moPioniers Park, pethimbo mpoka oshimaliwa sha thika poN$170 000 sha yakwa pomahooli ngoka okwa holoka paufupi mOmpangulilo yaMangestrata gwaVenduka.
Leonard Niilenge, ngoka iigandja yemwene kopolisi mOmaandaha okwa lombwelwa pethimbo a holoka mompangu kutya okwa taalela oshipotha shomuyekwa kwahomatiwa, okukala nondjembo shaali paveta na ina pulwa atye sha komatamaneko ngoka ta ningilwa.
Kuyele oshiwike shika oongangala dha homata odha ponokele menindjela gwosasiyona ndjoka yomahooli na odha pula opo a gandje oshako yiimaliwa koongangala dhoka.
Oya yi ontuku okuza pehala ndyoka okupitila miihwa mbyoka ya gama lyokoshiputudhilo shoUniversity of Namibia (Unam), omanga inaya nhukila mohauto yawo.
Mangestrata Jermaine Muchali Muchali okwa kunkilile Niilenge kutya okwa taalela omatamaneko omanene nongushu yiimaliwa mbyoka ta tamanekelwa a yaka oyi li pooN$170 000.
Oshipotha shoka otashi vulika shika undulilwe kOmpangu yoPombanda.
"Kala wa kotoka nge tashi kehogololo lyoye lyomukalelipo gwoye," Muchali ta lombwele omutamanekwa.
Niilenge okwa popi kutya otaka konga omukalelipo gwopaveta ngoka teke mu kalelapo moshipotha shoka.
Omufali gwiihokolola kompangu gwepangelo okwa tindi opo omutamanekewa apewe omboloha molwaashoka ota tamanekelwa oshipotha oshinene shomuyeka kwa homatiwa moka mwa kwatelwa ekalo noondjembo. Okwa popi woo kutya omuyalu gwoshimaliwa ngoka gwa yakwa omunene noonkondo.
Hatutale okwa popi kutya iimaliwa mbyoka ya yakwa inayi monikwa natango naashoka otashi ulike uunene woshipotha shoka.
"Omakonaakono nago ogeli pokantu yopetameko onkene itashi kala muuwanawa woshigwana oshowo uuyuki ngele omutamanekwa okwa mangululwa paku pewa omboloha," Hatutale ta ti.
Muchali okwa undulile oshipotha shoka komasiku 24 gaFebruali omvula twa taalela opo omakonaakono ngoka ga manithwe nomutamanekwa ota kala modholongo.
Okwa kunkilile woo omutamanekewa a ninge eindilo lye lyokupewa omboloha .
"Meindilo ndyoka owa pumbwa okugandja omatompelo kutya omolwashike wa hala okumangulukwa. Oto ka ningilwa omapulaapulo kepangelo oshowo komugandji guumbangi gwepangelo."
FRED GOEIEMAN