Ongundu yoRally for Democracy and Progress (RDP) otayi pula opo omuulikwa gwawo mOshikandjohogololo shaRuacana a fute nokushunitha iimaliwa yongundu ndjoka.
Abner Uunona ota pulwa afute nokushunitha iimaliwa yongundu sho andjoina oSwapo nokuthigapo oRDP mOsoondaha ya piti.
Uunona okwa ndjoina oSwapo pethimbo lyoshigongi shoSwapo shoka sha ningwa moRuacana kOminista yIikwameni nOmatembu
Pendukeni Iivula-Ithana.
"Otatu mu landula, na galule iimaliwa yetu," omupopiliko gwoRDP mOshitopolwa shaMusati,
Nghishiikoh Joshua Nghishiikoh, ngoka e li woo omuulikwahogololwa moshikandjo shaOgongo ta ti.
Okwa popi kutya RDP okwa futu Okakomisi kOmahogololo oshimaliwa shooN$2 500 momashangitho gaakalelipo yongundu
momahogololo, naayehe mboka ya ulikwa nokuningwa aahogololwa yongundu oya pewa oshimaliwa shooN$7 000 sha nuninwa eningo lyomahwahwameno. Koshimaliwa hoka okwa gwedhwa woo oshimaliwa shooN$1 500 shoka sha nuninwa omalweendo pethimbo lyomahogololo ngoka taga ningwa mEtitano ndika twa taalela.
"Mbyoka iimaliwa yoRDP onkene okwa pumbwa okugalula iimaliwa yongundu ngele hasho otatu ke mu katukila oonkatu dhopaveta," Nghishiikoh ta ti.
Okwa popi kutya Ongundu yoSwapo oya hala okuhanagulapo oRDP.
"Swapo kena ko nasha nongundu yilwe yopolotika. Elalakano lyawo okuhanagulapo oRDP, naamboka ye na oondjokonona oombwiinayi otaya ningwa aayuuki uuna ya zi koRDP."
PLACIDO HILUKILWA