Omunambelewa gwopolisi omunyasha okwa holola okuuva nayi kwe pethimbo a holoka mompangulilo oshikando shotango, ta tamanekelwa oshipotha shedhipago lyomulongwapangi Martha Ilonga.
Omunambelewa gwopolisi ngoka atumbulwa kedhina kutya oGeorge Ndemoongela okwa popi kutya okuuvite nayi omolwa edhipago lyaIlonga ngoka a dhipaga muFebruali.
Omutamanekwa okwa popi nOshifokundaneki shoNamibian Sun konima sho aholoka mompangu omolwa oshipotha shoka shedhipago.
Eholoko komeho yompangu lyotango lyaNdemoongela olya kaliwa kengungo enene lyaakwashigwana mwa kwatelwa ofamili yanakusa.
Omufali gwiihokolola kompangu, Maria Andimba okwa pula opo Omupanguli Desire Kamboua a lundululile oshipotha shoka kompangu yopashitopolwa, hoka Ndemoongela kwa tegelelwa a ka holoke momasiku 2 gaDesemba.
Sho a popi noshikundaneki shoNamibian Sun pondje yompangu, Ndemoongela okwa popi kutya okuuvite nayi na ota gandja ombili omolwa eso lyaMartha na okwa popi kutya ye okwa li owala ta longo iilonga ye.
"Ka sha li elalakano lyandje okudhipaga omuntu. Otandi gandja ombili kofamili," Ndemoongela ta ti.
Ndemoongela okwa popi kutya ina mona Martha kutya okwa li mohauto ndjoka na okwa li owala a hala okuumba komalola gohauto.
Edhipago lyaMartha olya e ta omahokololo ogendji ga yooloka kombinga yaashoka sha holoka shili esiku ndyoka.
Ndemoongela ngoka e li omushona kaamwayina yane, okwa popi kutya konima yoshiningwanima shoka, ofamili ye oya kala moluhodhi nokuuva nayi. "Otandi kala nduuvite nayi nonda geya ngele oshinima sha faathana osha holola komumwayinakadhona gwandje nenge kutate. Oshiwinayi noonkondo kofamili yaIlonga. Aantu oyendji kaye shi kutya oshike sha holoka esiku ndyoka na otaya dhilaadhila kutya otandi dhipaga owala omuntu ngaaka, ngame ondi na aamwamemekadhona, onkene itandi vulu owala okudhipaga omuntu ngaaka."
Ndemoongela ngoka a ndjoina etanga lyopolisi mo-2011 okwa popi kutya okwa li a nyanyukwa noonkondo sho a taambulilwa metango ndyoka opo a ka gamene aakwashigwana.
Ofamili yaIlonga oya holola okuuva nayi kwawo molwaashoka Ndemoongela ke li modholongo na okwa manguluka.
"Omolwashike keeli modholongo ngaashi aantu yakwawo mboka taya tamanekelwa omadhipago. Otuuvite nayi," omumwayinagona gwaMartha, Lusia Amunyela ta ti.
Ndemoongela okwa holoka mompangu konima yoomwedhi omulongo, sho oshiningwanima shoka sha holoka.
Martha okwa yahwa momasiku 12 gaFebruali, moshiningwanima shoka sha etitha opolisi yi gandje omatompelo ya yooloka kwaashoka sha holoka po esiku ndyoka.
Muule woomwedhi dha piti okwa holola omalimbililo kombinga yoshiningwanima shoka.
Ofamili otayi lundile opolisi oshowo Omupanguli-Ndjai kutya otaya holoke uuyelele.
Omupanguli-Ndjai, Martha Imalwa okwa tindi okugandja uuyelele kiikundaneki kombinga yetokolo lye konima sho epeko ndyoka lya li lya pewa ombelewa ye.
Konima yoshiningwanima shoka, oNamibian Sun oya li ya ningile omapulaapulo omuhingi gwohauto moka mwa li Ilonga pethimbo sho a yahwa. Omunamimvo, 19, Shuuveni Titus ngoka a li ta hingi ohauto ndjoka yuumbwa kopolisi okwa popi kutya pethimbo ndyoka okwa li woo e li nomufaalelwa gumwe ngoka a yakula ongodhi okuza ku kuume ke e li moHavana ngoka aniwa a pumbwa omahooli.
Sho ya dhiki, omuntu ngoka pumbwa omahooli okwa li nale e li naanambelewa yamwe yopolisi.
Titus okwa popi kutya okwa zimo mohauto ndjoka a li ta hingi opo a ka pule kutya uupyakadhi owuli peni, ihe okwa lombwelwa kaanambelewa yopolisi opo a dhigepo ehala ndyoka.
Okwa ti, okwa hingi owala oshinano oshishona okuza pehala ndyoka na okwa uvu ondjembo ya topa. Sho a tala konima ye okwa mono Martha a yahwa nekende lyohauto ye lyokonima lya tatuka.
Nonando ongaaka olopota ndjoka ya pitithwa kopolisi oya popi kutya, aanambelewa yopolisi oya li taya konaakona oshipotha shohauto ndjoka oya helula omuntu ngoka opolisi ya dhimbulula kutya oku li omufekelwa moshipotha shomuyeka kwahomatiwa. Oya popi kutya opolisi oya tula miipandeko omulumentu ngoka a helulwa mohauto ndjoka na oya dhimbulula woo kutya nakuhinga ohauto naye oku li omufekelwa ihe ohauto ndjoka oya yi ontuku nopolisi oya umbu nelalakano lyokulondodha opo omuhingi ngoka a thikame. Sho ohauto ndjoka inayi kankama, opolisi oya yaha ketayiyela lyohauto naashoka osha etitha oholo yimwe yi yahe Martha ngoka a li a kuutumba koshipundi shokonima.
GORDON JOSEPH