Omupresidende nale gwOngundu yoRally for Democracy and Progress (RDP) Hidipo Hamutenya, okwa popi kutya ye ota sile mOngundu tayi pangele na okwa popi woo kutya oshilongo osha taalela iinima iiwanawa melelo lyOmupresidende Hage Geingob.
Hamutenya okwa popi ngaaka, pethimbo a popi lyotango moshigwana konima nkene andjoina ishewe Ongundu yoSwapo. Hamutenya okwa popitha aakuthimbinga moshigongi shoSwapo shoka sha ningilwa moHelao Nafidi mOshitopolwa shaHangwena mOlyomakaya ga piti na okwa lombwele aakuthimbinga kutya omayambulepo goshilongo otaga vulu owala okumonika uuna oshilongo shi li momake gOngundu yoSwapo.
"Inamu haluka sho muwetendje nena mpaka mokati keni. Eeno onda galuka- onda galukila kegumbo nokoohailwa yakwetu oshowo ookume kandje mboka twa kokele pamwe nayo na otwa lu woo omalugodhi omanene pamwe," Hamutenya a popi.
Mboka ya kala moshigongi shoka, omwa kwatelwa Ominista yAaniilonga nEtotepo lyOompito dhIilonga, Erkki Nghimtina, Ominista yOmidhingoloko nOmatalelepo, Pohamba Shifeta, Omukomeho gwOkakomisi kOompangela dhoPashigwana, Tom Alweendo, Ngoloneya gwOshitopolwa shaHangwena Usko Nghaamwa oshowo Omukwaniilwa gwUUkwanyama Martha Mwadinomho Kristin Nelumbu.
Hamutenya okwa popi kutya ye pamwe nOmupopi nale mOmutumba gwoPashigwana, Theo-Ben Gurirab, Geingob oshowo yalwe oya kala pamwe pethimbo lyekondjelomanguluko lyaNamibia, kohi yelelo lyoSwapo.
Okwa popi kutya moSwapo, oya tulapo omulandu gwetungo lyoshilongo nokushikutha moluhepo nomukithi. Oshilongo moka Aanamibia taya kala noonkalamwenyo dhawo mombili naanona yawo otaya mono elongo lyongushu oshowo omayakulo gopaunamiti.
Hamutenya okwa popi kutya oya za nale moku adha omalalakano gaashoka taya ningi ihe natango ope na oshindji shoka sha pumbwa okuningwa.
"Kandi na omalimbililo ngele ondjodhi ndjika otayi ka tsa. Otu na omuleli omuwanawa Komrade Hage Geingob, okwe tu pe omukumo omupe. Kohi yelelo lye oshilongo osha taalela iinima iiwanawa," Hamutenya ta ti.
Okwa tsu omukumo kehe gumwe ayambidhidhe Geingob, nokukwashilipaleka kutya okwa kalekwapo uukumwe , ombili nonkalonawa yoshigwana.
"Onkene mpaka nena otandi mu pula ookmrade mugandje eyambidhidho komupresidende gwetu oshowo Ongundu yoSwapo," Hamutenya a popi na ina gandja omatompelo ge kutya omolwashike a dhigipo Ongundu yoRDP.
Junias Nghishoongele okwa popi kutya egaluko lyaHamutenya olya kala lya tegelelwa nale.
"Ontseyo ye ndjoka a likola pethimbo lyekondjelo lyemanguluko lyoshilongo oshowo uunongo we awuhe otawu vulu owala okugandja omauwanawa kOngundu yoSwapo noshilongo," Nghoshoongele tati.
Omuyambidhidhi gumwe gwoSwapo ngoka a kala moshigongi shoka, Kauna Shoongidwa okwa popi kutya Hamutenya okwa kala e holike moSwapo nonando okwa li adhigipo oSwapo.
Hesekiel Shingodyo okwa popi kutya nonando Hamutenya ina lombwela natango oshigwana kutya omolwashike a dhigipo tango ongundu tayi pangele, shoka shi na oshilonga oshooka kutya omatompelo ngoka gali gemu falitha kongundu yompilameno kage na we oonkondo.
"Okwa thigipo oSwapo molwaashoka okwa li ke uvitile nawa oshinima shontumba mongundu, ihe ngele okwa galuka otashi ulike kutya natango okuna omukumo mongundu tayi pangele,"Shingodyo ta ti.
MERJA IILEKA