Omu na owala ombete yimwe yokupulumuthila uunona mOshipangelo shOpashikandjo shaEngela mOshitopolwa shaHangwena omanga oonkalamwenyo dha tulwa moshiponga omolwa ompumbwe yaaniilonga ya pyokoka oshowo iikwaniipangitho mendiki ndyoka lyuundjolowele.
Omunambelelwa omukuluntu gwuunamiti moshipangelo shoka, Bernard Sikombe okwa popi kutya uuministeli wawo owuna ontseyo kombinga yompumbwe yoombete moshipangeo shoka na okwa li atseyithile Minista Bernard Haufiku kombinga yompumbwe ndjoka pethimbo Haufiku a talelepo oshipangelo shoka momwedhi Kotomba.
Omukomeho guundjolowele gwopashitopolwa, John Hango okwa koleke kutya oombete ndatu okwa tegelelwa shi thike moshipangeloshoka muule woshiwike shika.
Ina vula okupopya kutya oshipangelo shoka osha kala nokulongitha owala ombete yimwe uule wethimbo li thike peni.
Nonando omalelo goshipangelo oga popi kutya oshipangelo oshi na oombete dha gwana dhokukala aakiintu mboka ye li momategelelo, aakiintu aanyasha yatatu oya lombwele oNamibian Sun kutya ohaya lala momikala dhoshipangelo.
Karin Andreas gwoomvula 17, a za momukunda Omafo okwa popi okwa kala ta lala pekumbatha mewalanda lyokupulumuthila moshipangelo shoka.
Nonando ongaaka, omukomeho gwewalanda ndyoka Omundohotola Lama Okitemungu,
okwa popi kutya aakiintu oyoyene haya tokola opo okulala momikala omolwa uupyu nonando oya taambelwa moshipangelo.
"Otuna oondunda dha gwana, ihe yamwe ohaya tokola okulala pondje inaye tu tseyithila," Okitemungu ta ti.
Onkalo ndjoka oye ya polweela pethimbo mpoka Namibia kwa popiwa kutya okuli shimwe shomiilongo tayi longo nuudhiginini mokuyambulapo onkalo yuundjolowele waakiintu yiihumbata noohanana oshowo okushunitha pevi omaso mokati kaakiintu pethimbo taya pulumutha oshowo omaso guunona pethimbo tawu pulumuthwa. Onkambadhala dhoka odhili oshitopolwa shoMillennium Development Goals (MDGs).
Kwiikwatelwa kolopota yoMDGs, omalalakano ngoka oga adhika owala netata kiilongo ya thika pomugoyi. Olopota oya holola kutya ondjele yaNamibia monena oya gu pevi kashona nomonena oya thikama po- 265 momaluvalo ga thika 100 000 konima sho kwa lopotwa kutya ondjele ndjoka oya li po-319 momaluvalo 100 000 momvula yo-2010.
Olopota oya holola woo kutya omaso ngoka miilongo yaSub- Sahara Afrika oge li poopresenda 66.
JEMIMA BEUKES