Aaniilonga yehangano lyoPupkewitz Megabuild mondoolopa yokomunkulofuta gwaMbaye, otaya lili omolwa oondjambi dhawo dhoka ya popi kutya odhili pevi noonkondo na ihaya mono iiyemo yolupandu lwasha kehulilo lyomvula kakele kopaati yokwiinyanyudha ndjoka haya ningilwa komvula.
Oya popi kutya elelo lyehangano kali na ko nasha nuuwanawa waaniilonga.
Nonando aaniilonga ya ningi omanyenyeto geli ngaaka, omunambelewa omukuluntu gwoPupkewitz Megabuild, Marcel Lamprecht, okwa pataneke omapopyo gaaniilonga ta popi kutya omiyalu dhoondjambi dhoka ya popi kutya odho haya mono, kadhi li nokuli popepi nomiyalu dhoondjambi dhoka haya mono.
Okwa popi kutya onga ongeshefa ndjoka tayi kokelele, Pupkewitz Megabuild ita tala owala komudhingoloko gwedhigathano momalanditho ihe ota tala woo kaaniilonga ye, oshowo kookastona nokuyambulapo onkalo yoositola dhe.
Lamprecht okwa popi kutya ehangano olya talako aaniilonga lyawo onga omaliko omanene gehangano onkene otali kwashilipaleke kutya oya mona iiyemo yili pauyuuki okuyeleka nomayakulo ngoka haya gandja.
Aaniilonga ya thika po-60 haya longele ehangano ndyoka mondoolopa yaMbaye oya popi kutya inaya nyanyukilwa omayamukulo ngoka ga gandjwa kehangano na oya popi kutya oyali ya yamukulwa kutya ngele kaya uvitile ombili oondjambi dhoka taya mono nena naya thigepo ehangano ndyoka.
Aaniilonga yamwe mboka ya popi meholamo omolwa uutile kutya otashi vulika ya kanithe iilonga yawo oya popi kutya oya kala taya pula oondjambi dhili hwepo uule woomvula ntano monena ihe omaindilo gawo oga gwile momakutsi ga thita.
Oya popi kutya otaya longo sigo onena nonando oondjambi dhawo inadhi talululwa molwaashoka oshidhigu okumona iilonga palwe.
Pahapu dhaaniilonga ehangano ndyoka ohali gwedhele owala oondjambi dhawo noopresenda 6 komvula naaniilonga ohaya vulu okulonga aniwa oomvula dha thika po-10 oondjambi dhawo inadhi talululwa nenge ya yelwe miilonga.
Oya popi kutya aaniilonga mboka itaya kalele ohaya kala unene ethimbo ele kokondalaka inaya kutililwa na ohaya mono ondjambi yooN$50 mesiku.
Aaniilonga mboka haya futwa oondjambi dhili pevi ohaya longo iilonga ayihe, na kaye na omusholondondo gwiilonga mbyoka ya kutilwa okulonga na ohaya iyadha taya wapaleke uundjugo, taya wapaleke moositola oshowo iilonga yilwe mbyoka taya pulwa ya longe.
Aaniilonga mboka haya futwa oondjambi dhili pevi ohaya mono oshimaliwa shooN$ 2 300 komwedhi.
"Otatu kondjo nuudhigu okugwanitha po oompumbwe dhetu nokuyambidhidha aakwanezimo yetu. Yamwe otwa longa uule woomvula 15 ihe onkalo yetu itayi lunduluka. Ihatu pewa oobonasa pehulilo lyomvula. Uuna omalanditho taga ende nawa ohatu ningilwa owala oopaati kehulilo lyomvula," omuniilonga gumwe ta ti.
"Otatu longo oowili oonde. Katu na omauwanawa gasha, ngaashi omagumbo nuumamiti. Mongashiingeyi ngele gumwe gwomutse okwa hulitha nena ohatu gongele iimaliwa mokati ketu opo tu kwathele melongekidho lyefumbiko. Ehangano ihali kwathele sha, nando ngaa oshiyenditho. Ipula nee omuntu ngoka a longa uule woomvula 25," Moses Kuze, omuniilonga ta popi.
Omuniilonga gumwe Simon Erasmus okwa popi kutya ehangano otali wapaleke ostola.
"Otwa lombwelwa kutya ewapaleko ndyoka otali ka pula oshimaliwa sha thika poomiliyona 60, ihe natango itaya vulu okutala koondjambi dhetu. Ohatu ningi iimaliwa oyindji kehe omweedhi naashoka ta tu pula kashi shi oshindji. Tse aantu owala ngaashi aantu ayehe na otwa pumbwa okwiihumbatelwa nesimaneko, otu na oofamili dhoka tu na okusila oshisho."
Lamprecht okwa popi kutya, ohaya gandja oondjambi taya tala kedhigathano lyomalanditho. Okwa popi kutya ehangano ohali futu oopresenda 50 kuuwanawa womaunamiti oshowo oopresenda 10 kopenzela yaaniilonga.
Momauwanawa ngoka haya gandja aniwa omwa kwatelwa iifuta yomaulema.
Okwa popi kutya omuniilonga owala gumwe a popi kombinga yoondjambi namenindja gwostola yomOmbaye konima nkene a tameke iilonga mesiku 1 Aguste nondjambi ye oyali ya gwedhelwa.
Okwa popi kutya aaniilonga ohaya yelwa shiikolelela kiilonga yawo.
Lamprecht okwa gwedhapo kutya omulandu gwehangano lyawo otagu utha opo aaniilonga yopakathimbo naamboka itaya kalelele ya futwe mowili ngaashi sha uvathanwa nokuziminwa kehangano lyoMetal and Allied Namibian Workers Union (MANWU) noConstruction Industry Federation (CIF), nezimino ndyoka olya li lya pitithwa moGovernment Gazette.
Omulandu gwehangano ndyoka otagu utha ehangano opo ka li longithe aaniilonga yopakathimbo omasiku ge vulithe pugaali moshiwike nenge oomweedhi ndatu dha landulathana.
KAKUNAWE SHINANA