Aaleli yopamuthigululwakalo mboka ya li ya kuthwa miilonga melelo lyUukwanyama kOmukwaniilwa Martha Mwadinomho Christian Nelumbu, omimvo dha piti na oya kala taya kondjo opo ya shunwe miilonga oya fala oshipotha shawo kOmupresidende Hage Geingob.
Mwene gwomukunda gwaOngha nale, George Hikumwa, oye a gandja omanyenyeto ngoka kuGeingob pethimbo omuleli a yi moonkundatha naakwashigwana mOshitopolwa shaHangwena mEenhana oshiwike sha piti.
Hikumwa ota lundile Elelo lyUukwanyama kutya otali lele pa wu kayamukulwa, pwaahena uuyuki na otali pula iifuta yi pombanda nonando iifuta mbyoka itayi gandja uuwanawa washa kaakwashigwana.
Hikumwa okwa pula woo opo aaleli yopamuthigululwakalo ya hogololwe ngaashi aanambelewa yopolotika.
Geingob ka li a nyanyukilwa omanyenyeto gaHikumwa na okwa popi kutya oge li okwaahena esimaneko lyOmukwaniilwa Nelumbu ngoka a li woo momutumba ngoka.
Omanyenyeto gaHikumwa oga ekelwahi woo kelenga enene George Nelulu ngoka a popi kutya ka mu na uushili momanyenyeto ge.
“Omanyenyeto ngoka a gandja kOmupresidende iifundja yowala. Okugandja omanyenyeto giifundja komuleli oshi li tashi ulike okwaahena esimaneko nomutse gwoshilongo, nelago enene ngaashi twa kala twa tegelela omuleli okwa tindi omanyenyeto ge,”Nelulu ta ti.
Nelulu okwa popi woo kutya Hikunwa okwa kala omuleli gwopamuthigululwakalo uule woomvula odhindji omanga ina hogololwa ihe monena ota pula aaleli yopamuthigulukwakalo ya hogololwe.
Hikumwa okwa kuthwa oshinakugwanithwa she onga mwene gwomukunda gwaOngha omimvo dha piti pamwe nelenga enene lyOshikandjo shaKelemba Hangula Vatilifa oshowo Sipora Weyulu-Dan gwOhaingu. Otaku popiwa kutya mboka oya kuthwa miilonga molwaashoka otaya eta epiyagano melelo ndyoka na oya dhini omalombwelo gomukwaniilwa. Mboka oya ka konga ekwatho kOmpangu yoPombanda ndjoka ya li ya gandja elombwelo muuwanawa wawo ihe Elelo lyUukwanyama olya pataneke etokolo. Oshipotha shoka natango inashi manithwa.