Omupresidende gwaNamibia, Hage Geingob, ngoka akaleke olweendo lwe lwokuya koTurkey opo a kale momutumba tagu ithanwa Poverty Eradication and Wealth Redistribution Conference mOvenduka okwa popi kutya omvula ya hugunina yopaigwana yo-2030 moka omo kwa tegelelwa kukale kwa etithwa pehulilo oluhepo oyi li kokule.
Moonkambadhala shokutsitha ondjodhi ndjoka, oshimaliwa sha thika poomiliyona 50 oshiikalekelwa na osha nuninwa okukondjitha oluhepo yAanamibia mokati kaakwashigwana.
Moonkambadhala dhokulwitha oluhepo omwakwatelwa etotepo lyombaanga yiikulya ndjoka tayi ka totwapo mekathelo lyaatseyinawa ya za koCuba.
Aanyasha mboka yaahena iilonga oyo taya ka dhana onkandangala onene metopolelo lyiikulya oofamili dhoka dhili mompumbwe.
“Aanyasha mboka otaya ka mona iiyemo omolwa iilonga mbyoka taya ka longa,”Geingob ta ti.
Okwa gwedha po kutya aanafalama yopangeshefa oya zimine opo ya kale taya gandja omagano kehe omvula goongombe mbali nenge iiyamakuti.
“Elalakano enene okukondjitha ondjala noluhepo mokati kAanamibia unene momidhingoloko dhomuushayi moka aantu kaye na we omapya taga vulu okuza iipalutha ya gwana. Momagumbo gAanamibia hakanona taka lumbu nondjala.”
Okwa pula woo opo oohecta dhevi lyuunene wo-50 000 okuza moohecta dhuunene 250 000 mofalama yepangelo moMangetti dhi longithwe mokulonga oondya dhombanga yiikulya.
“Aanyasha mboka yaahena iilonga na otaya lili kehe ethimbo otaya ka longithwa opo ya vule okwiimonena iiyemo pehala lyokukala taya ende owala momapandaanda.”
Uuministeli wOohi nawo otawu ka dhana onkandangala mokugandja oohi kombanga ndjoka.
Geingob okwa popi kutya epangelo olyali li li pokumanithwa omusindalandu ngoka gwa nuninwa okushunitha pevi omwakwa gwiiyemo mokati kaakwashigwana, elundululo lyomadhilaadhilo olya pumbiwa mokati kaagandji yiilonga opo ya vule okufuta aaniilonga yawo oondjambi dhi li hwepo.
Okwa pula woo omahangano ga gandje iipambuliko kaaniilonga. Omuleli okwa popi kutya epangelo otali pangele okutula miilonga iishoshela tayi ithanwa ‘solidarity tax’ momutengenekwathaneko gwoshimaliwa tagu landula, opo Aanamibia ayehe mboka haya mono iiyemo yili pombanda yondondo yontumba ya vule okufuta iishoshela mbyoka tayi ka longithwa nokukwathela miilongadhala yokukondjitha oluhepo nondjala.
Ominista yEkandulepo lyOluhepo nOnkalonawa, Zephania Kameeta, okwa pula opo ku totwepo meendelelo oshiketha shomayambudhidho shoka tashi ka kwathela aakwashigwana mboka yeli unene mompumbwe.
Kameeta okwa tseyitha kutya ye pamwe naapeha ye Priscilla Beukes naAino Kapewangolo, otaya ka gandja kehe gumwe oshimaliwa shooN$5 000 koshiketha shoka.
Okwa popi kutya okwa mono ompumbwe ndjoka pethimbo a yi moonkundathana naakwashigwana.
Osheya puuyelele pethimbo aningi oonkundathana dhoka kutya aanona yamwe ohaya ende iinano yookilometa heyali okuya kooskola mompunda kamu na sha.
Kameeta okwa popi kutya aantu yamwe miitopolwa yomuushayi otaya nyenyeta kutya ohaya nu mumwe niimuna omanga yamwe ya popi kutya oomboola dhomeya dhoka dha hupwa popepi nayo ihadhi longithwa molwaashoka inadhi tulwa iilongitho yokupomba omeya.
Okwa popi woo kombinga yekemo lyaantu mboka ya manitha omailongo gawo kiiputudhilo yopungomba ihe itaya vulu okutameka oongeshefa dhawo omolwa ompumbwe yiimaliwa yokutamekitha.
“Shoka tashi etitha unene uupyakadhi woluhepo mokati kaakwashigwana ompumbwe yetulo miilonga lyooprograma noopoloyeka dhoka dha nuninwa okukandulapo oluhepo,”Kameeta ta ti.
JEMIMA BEUKES
Category: