Egeelo lyokufuta ooN$2 000, elondodho lyopamushangwa, eshunitho pevi lyonkatu yiilonga nenge eikutho miilonga ogo gamwe po gomomageelo haga pewa aalongiskola mboka ya pogola.
Shoka osha uthwa kOmpango yAaniilonga yEpangelo onti-13 ndjoka ga gandja ompito kaalongiskola oshowo aaniilonga yamwe yepangelo mboka taya monika ondjo momaihumbato gonayi, naashoka otashi etitha opo oonakuninga iihakanwa kaya mone uuyuuki.
Pahapu dhaMinista gwElongo Katrina Hanse-Himarwa, Ananias Kamati, omulongiskola gwomoskola yaAugustineum Secondary School ngoka taku popiwa kutya okwa dhipaga omunaskola gwoomvula 18, Jacqueline Kuaseua pamwe nomumwayinakadhona gwaJacqueline, Cecilia mboka ya dhipagwa mEitano lyoshiwike sha piti, okwa li a lundililwa ekwatathano lyopaihole nomunaskola koskola yimwe hoka a li ha longele tango.
Omufekelwa otaku popiwa kutya okwa li mekwatathano naJacqueline, ngoka a li woo omulongwa gwe gwelaka lyOshiherero.
Pethimbo lyomutumba niikundaneki ngoka a ningi oshiwike sha piti, Hanse-Himarwa okwa popi kutya Kamati ina vula okupangulwa molwaashoka okwiikutha miilonga sho sha monika mo kutya okuli mekwatathano lyopahole nomunaskola poskola yaC. Heuva Junior Secondary School mOshitopolwa shamaheke mo-2010.
Hanse-Himarwa okwa popi kutya Kamati ina lundululilwa koskola yimwe kuuministeli.
Minista okwa tseyitha kutya iipotha ya thika po-27 yaalongiskola ye li momakwathano gopahole naanaskola oya lopotwa moshilongo omvula ya piti omanga mo-2013 mwa lopotwa iipotha 39. Aalongiskola ayehe mboka oya pangulwa naminista okwa popi kutya uuministeli otawu longo nuudhinginini opo wu vule okukandula po uupyakadhi mboka.
Okwa popi kutya ope na omakonaakono gopane haga ningwa okumona ngele omuntu okwa monika ondjo.
“Omukalo ngoka omule na ohagu kwata ethimbo na otwa dhidhilike kutya aalongiskola yamwe ohaya thigi po iilonga omanga omakonaakono inaga manithwa omanga yamwe haya pataneke iizemo yomakonaakono.”
Okwa popi kutya oye na olukeno molwaashoka aavali yamwe itaya vulu okugwanithilapo oyana oompumbwe dhawo ihe okwa pula aavali kaya tule oyana moonkalo dha nika oshiponga noku etha ya ye momakwatathano gopahole ngoka taga vulu okutulitha moshiponga oonkalamwenyo dhawo.
KENYA KAMBOWE