Omahogololo ngoka oga kwatelwa komeho kOmupopi mEgumbo lyoPashigwana, Peter Katjavivi, ngoka e li omuleli gwongundu ngoka apewa oshinakugwanithwa shokukwatela komeho oshitopolwa shaTjozondjupa. Katjavivi okwa popi kutya omahogololo ngoka oga ningwa pauyuuki.
Nonando ongaaka okwa holoka omapopyo kutya okwa longwa uulingilingi nomahogololo ngoka ga ningwa moKahandja kaga li pauyuuki. Aantu yamwe aniwa oyiishangitha opo ya ka hogolole miitayi ya thika puitatu.
Okwa popiwa kutya iilyo yimwe yOngundu yoRDP oya thikama onga iilyo yoSwapo, sha etitha aakomeho mongundu ya tinde iizemo yomahogololo ngoka.
Otashi ulike kutya olugodhi olu li pokati kaMayola gwaKahandja Valerie Aron, ngoka e li woo omukwatakanitho gwongundu moshikandjo shoka, oshowo kansela gwoshikandjohogololo shoka na okuli ta longo pehala lyomukwatakanithi gwoSwapo moshitopolwa shoka, Steve Biko Booys.
Yamwe po yongundu ndjoka oya popi kutya mboka yaali oya kala noontamanana pokati kawo dhoka monena tadhi gumu woo iitopolwa yilwe melelo lyongundu pashitopolwa.
Namibian Sun okwa mono ombapila ya shangwa momasiku 28 gaSepetemba ndjoka ya tuminwa Amushanga-Ndjai gwongundu, Nangolo Mbumba na oya shainwa muMayola gwaKahandja Valerie Aron oshowo omupopiliko gwomongundu pashitopolwa shoka Victor Nakapandi.
Sho a pulwa a popye sha kombinga yoohapu dhoka, Aron okwa tindi na okwa ukitha omapulo agehe komukwatakanithi gwopashitayi shoka omanga Booys a popi kutya oye okwa ninga shoka kwa li a tegelelwa aninge. Ongodhi yaNakapandi inayi yamukulwa.
Ombapila ndjoka ya shangelwa Mbumba oya popi kombinga yuulingilingi mboka aniwa kwa dhidhilkwa wa longwa miitayi ngaashi shaNehale, Utoni Nujoma oshowo moshitayi shaAnton Lubowski.
Kwiikwatelelwa kombaapila ndjoka, Booys aniwa okwa gandja elombwelo koshitayi shaNehale opo ku ningwe omalunduluko nokukuthamo mboka kaye na uukwashilyo.
Otaku popiwa omalunduluko ngoka inaga ningwa nomuleli ngoka a pewa oshinakugwanithwa shomudhingoloko ngoka na oku li ominista yoPublic Enterprise, Leon Jooste, okwa tokola okuya nokutsikila noshitayi sha landulako shoka sha adhika nale tashi hogolola aakalelipo yongundu.
Booys nayalwe aniwa ‘yombaki yoIsuzu ontokele’ otaya lundilwa kutya oya falele ookomrade yalwe yahamano komutumba gwomahogololo mwa kwatelwa iilyo yongundu yompilameno.
Omukwatakanithi gwoshitopolwa Bernhard Martin okwa koleke kutya oku na ontseyo yombaapila ndjoka ya shangwa tayi pula opo omahogololo ngoka ga ningwa ga talikeko kutya kage li pauyuuki.
“Aantu yamwe kaye shi yomoshitayi shaNehale. Oya li owala yahala okukutha ombinga momahoghololo omanga yamwe ya kengelele mokuninga uukalata wawo wuukwashilyo,” Martin ta ti.
Mombapila omwa popiwa kutya uukalata mboka owa shainwa komuntu ke na epitikilo lyokuwushaina.
“Aantu yamwe oya pewa uukalata na kaye na uumutse woshilongo. Omasiku ga puka oga shangwa puukalata mboka na otaku fekelwa kutya yamwe oya longitha uumutse kawu shi wawo,” ombapila ya holola.
Ombapila ndjoka oya holoka kutya omakonaakono oga ningwa owala miitayi yimwe po ngaashi shaJesus Awala, Komesho, Moses //Garoeb naImmanuel Ngatjizeko.
“Nonando okwa ningwa omapulaapulo na okwa gandjiwa omaiyuvo shoka inashi talika na inaku ningwa omakonaakono pethimbo lyomahogololo, onkene ota tu pula ombelewa yoye opo yininge etokolo kokutalikeko kutya iizemo yomahogololo ngoka ga ningwa miitayi moka kayi na oonkondo ko taku tumwa osheendo shimwe shi ye shitalele omahogololo miitayi ngaashi Nehale, Anton Lubowski, Utoni Nujoma .”
Ombapila ndjoka oya pula woo opo kuningilwe omakonaakono uukalata wuukwashilyo mboka taku popiwa kutya owala longithwa.
Mbumba ina vula okumonika opo a yamukule kombinga yombaapila ndjoka a shangelwa.
ELVIS MURARANGANDA