Jeffrey Barman, 24, okwa pewa egeelo lyokukala modholongo oomvula 25 moshipotha shedhipago oshowo omvula yimwe moshipotha sheponokelo neehameko kolutu.
Omupanguli mOmpangu yoPombanda Christie Liebenberg okwa tsu omuthindo kutya Barman okwa longo oshimbuluma shomomagumbo molwaashoka okwa li e li mekwatathano lyopahole naMelanie Booysen na oye na woo okanona kokakadhoka koomvula ne.
Barman okwa monika ondjo moshipotha shedhipago, iipotha iyali yonkambadhala yedhipago oshowo oshipotha sheponokelo neehameko kolutu.
Melanie Booysen okwa tsuwa nekende lya tatuka mothingo momasiku 10 gaNovemba, 2012, sha ningilwa mehala lyomagumbo moGolgota, pethimbo lyoshituthivalo shokanona kawo kokakadhona.
Oshiningwanima shoka osha ningilwa konima yegumbo, sha ningilwa miipathi yayina yanakusa, Susanna Booysen, Ivan Hamaseb, Getruida (Heidi) Barman.
Pethimbo a gandja egeelo kunakumonika ondjo, Omupanguli Liebenberg okwa popi kutya omaihumbato guuhwapindi gaBarman ogo ga etitha a ponokele Booysen.
Olopota yoshiyetithi sheso oya holola kutya, ekende ndyoka lya longithwa mokutsa Booysen olya tekele mothingo ye na olyo lya etitha eteto lyomuthipa gwombinzi shoka sha etitha eziyo lyombinzi oyindji shoka sha etitha eso.
“Ndika edhipago lyuuhwapindi ndyoka lya li inali pumbwa okuholoka,” Liebenberg ta ti.
Okwa popi kutya nonando inaku lopotwa ondjokonona yuuhwapindi nemonitho lyiihuna mekwatathano lyawo, uumbangi otawu ulike kutya omaihumbato gaBarman esiku ndyoka otaga ulike kutya ke na esimaneko lyaBooysen oshowo ofamili ye nonando okwa kala ha zi pamwe nayo.
Liebenberg okwa popi kutya uuna aantu ye li mekwatathano lyopahole oshi li mondjila okukala ye na omatompelo nomadhilaadhilo ga yooloka na itaya tsu kumwe omathimbo gamwe ihe oshigwana inashi tegelela omahatsokumwe gawo ga shituke iikolokosha.
“Omutamanekwa okwa hololele aantu omikalo dhe dhuuhwapindi pwahena omatompelo gasha na okwa ponokele nokudhipaga nakusa.”
Omupanguli okwa popi kutya nonando shoka osho oshikando shotango Barman ta tamanekwa, oshimbuluma shoka a longo otashi pitika opo a pewe egeelo enene.
“Otashi ulike kutya kape na eshuno pevi lyomiyonena nomadhipago taga ningilwatana momagumbo nonando ompangu oya kala na otayi tsikile nokugandja omakunkililo. Ompangu otayi tsikile nokugandja omageelo geli pombanda moonkambdhala dhokukondjitha omiyonena dholudhi ndoka dhoka dha lundalala tadhi ningilwa aakiintu naanona.”
OVENDUKA FRED GOEIEMAN
Category: