Opolisi otayi konaakona eso lyomunamimvo 20 omwiilongi mOshiputudhilo shoUniversity of Namibia (Unam) ngoka a dhipaga pethimbo lyonkambadhala yomuyekwa kwa homatiwa ngoka gwa ningilwa popepi noshiputudhilo mehuliloshiwike.
Pauyelele mboka wa gandja kOmunambelewa Omupopiliko gwOpolisi, Slogan Matheus, Rodney ‘Oumes’ Gariseb pamwe nookume ke yaali oyali molweendo lwawo okuya moshiputudhilo okuza pehala lyoositola moPionierspark sho ya ponokelwa kaalumentu.
“Aailongi mboka oya yi ontuku ihe aafekelwa mboka oya umbu aailongi mboka sha etitha gumwe a yahwe na okwa lopotwa kutya okwa hulithile pehala lyoshiningwanima.”
Matheus okwa popi kutya kape na ngoka atulwa miipandeko nopolisi otayi longo nuudhiginini opo yi tule miipandeko aafekelwa mboka.
Omukalelipo gwAiilongi mOshiputudhilo shaUnam, Vincent Shimutwikeni, ngoka a londo pamwe naGariseb moambulansa okwa popi owala okutya “oshiwinayi noonkondo.”
Aailongi yaUnam oya kala nokupula opo ku yambulwepo egameno mwa kwatelwa ewapaleko lyiihwa mbyoka tayi adhika popepi noshipitudhilo.
Pahapu dhaAmushanga gwOmauyelele moSRC, Tom Edison Shilongo, aailongi otaya kaya momapandaanda taya pula opo elelo lyoshiputudhilo li ka tuke oonkatu.
“Opwa kala nale omanyenyeto gena sha negameno. Aailongi oya kala nokunyenyeta kutya oongangala ohadhi yaka po iinima yawo. Ope na woo omathimbo gamwe aaiilongi ya kala nokuponokelwa okuza puushina wokunana iimaliwa.”
Shilongo okwa popi kutya okuna einekelo kutya oshiningwanima shika otashi ka etithwa elelo lyoshiputudhilo li kutheko omanyenyeto gaailongi onga gena oshilonga.
Omupopiliko gwaUnam, John Haufiku, okwa popi kutya oshiputudhilo oshi uvite oluhodhi pamwe nofamili oshowo ookume yaGariseb.
“Nonando oshiningwanima shoka osha ningilwa oometa 350 okuza poshiputudhilo, oshiputudhilo otashi ka katuka oonkatu. Egameno lyaailongi inali pumbiwa owala moshiputudhilo ihe nopomudhingoloko woo gwoshiputudhilo. Nonando oshiputudhilo itashi vulu osho ashike okukandeka omiyonena moshilando shetu, itatu kala twamwena nokupitika owala oomwenyo dhaailongi yetu tadhi kala.
Otatu kwashilipaleke aavali naailongi kutya oshikumungu shika otashi taliwa nomeho omanene,” Haufiku ta ti.
Mo-2012 omumwiilongi omunamimvo 23 okwa li a taambelwa moshipangelo omolwa ehaluko naasho a kanitha omayego ge gaali sho a ponokelwa mondunda ye yokulala momuhandjo goshiputudhilo.
Haufiku okwa zimine kombinga yomiyonena dhoka tadhi holoka moshiputudhilo ihe okwa popi kutya kena ontseyo yomiyonena dholudhi ndoka dha lopotwa nuumvo.
JEMIMA BEUKES
Category: