Aakonaakoni yoonzo dhoohi otaya nyanwa molwaashoka aniwa oya ndopa okukandulapo omukundu gwokuyonagula omikalo dhokukwata oohi momulonga gwakavango.
Omukalo ngoka okwa lopotwa gwa yonagula oshindji nokweetitha ompumbwe yohi momulonga ngoka.
Ombapila ndjoka ya shangelwa Uuministeli wOohi nOonzo dhOmomeya, ya shangwa kiilyo yoKavango Open Africa Route (KOAR) oya popi kutya oohi ngashiingeyi odha pumba momulonga gwaKavango omolwa ekwato lyoohi inali pitikwa ndyoka tali ningwa momulonga ngoka.
Ongundu oya nyenyeta woo kokmukalo ngoka hagu longithwa pakukwata pohi noonete, ya popi kutya konima nkene uunene woonete wa lelepekwa noometa 100, oohi odhindji odha kala tadhi kwatwa okuza momulonga moka kaakwati yoohi aaNamibia naAngola.
Omukalo gwokumangela oonete kuukanona nokuhila oonete dhoka ogwa etitha aakwati yoohi ya kwate oohi dhomaludhi agehe oshowo dhuunene kehe.
Uusama otawu pewa aanambelelwa yekondoololo lyoohi muuministeli mboka ye na oshinakugwanithwa shokutonatela omahala ngoka haga kwatwa oohi nokugandja omageelo kwaamboka taya taaguluka oompango.
Aanambelewa mboka oya nyenyeta kutya nayo oya taalela omikundu dhoka tadhi imbi opo ya gwanithe po iinakugwanithwa yawo ngaashi sha tegelelwa.
Momikundu dhoka ya taalela omwa kwatelwa ompumbwe yiiyenditho, omaholi, uumbautu, aaniilonga ya gwana, iiyemo oshowo okwaahena elongelo kumwe okuza kombinga yaAngola.
Ombapia ndjoka oya shainwa komunashipundi gwoKOAR,
Mark Paxton, oya holola kutya otashi ulike kutya aanambelelwa mboka kaye na we ohokwe yokukalekapo elandulathano na otaya gandja omaipopilo kehe.
Ombapila yimwe ndjoka ya shangelwa uuministeli, aanambelewa mboka okwa hololwa kutya oyo yeli oshitopolwa shomukundu pehala ya kale aakandulepo yomikindu.
Pahapu dha Paxton, nonando aanambelewa yopolisi nayo oya taalela omikundu ngaashi dhoka, aanambelewa yamwe po aakuluntu oya katuka oonkatu nokutula po omalongelokumwe noombushe miilonga yaAngola.
Metitano lya piti, opolisi oyali ya ningi epatololo nopethimbo ndyoka Paxton okwa gandja ekwatho lyombauto oshowo oshiyenditho opo ku vule okukwatako oonete dha thika po-40 ndhoka dha longithwa shaaheli paveta mokukwata oohi, dhaakwati yoohi ya thika po-12.
Nonando opatolola ndjoka inaayi vula okugandjitha omageelo nenge okutulitha miipandeko , Paxton ota pandula opolisi nelongelokumwe pokati kopolisi yaAngola naNamibia.
Nonando ongaaka okwaahena elongelokumwe okuza kaakonaakoni yoohi itashi humitha komeho ekondololo negamenenepo lyoohi momulonga ngoka.
Mombapila ndjoka ya shangelwa uuministeli omvula ya piti ,oya holola kutya oonete nale okwali owala dha pitithwa opo dhi kale tadhi vuli okuya kohi yomeya uule woometa 15 sigo opo 20 ihe ngashiingeyi uule mboka owa lelepekwa sigo opoometa 100.
Monena aakwati yoohi mboka ohaya kwata oohi uusiku opo ya vule okulongitha oonete dhawo dhoka.
Nonando onkalo ndjoka otayi gumu oshikondo shaatalelepo shoka shili osho shimwe shomiikondo ya gandja oompito dhiilonga odhindji momudhingoloko ngoka, uuna okwa yi wa moshipala okukwata oohi aanafaalama nayo otaya ka gumwa konkalo ndjoka sho oyendji yiikolela momulonga moka pakukwata oohi dhawo dhomalanditho.
Uuministeli wOohi nOonzo dhomomeya owa ningilwa omapulaapulo kombinga yoshikumungu shika ihe inawu vula okugandja omayamukulo omanga onkundana ndjika inayi nyanyangidhwa.
JANA-MARI SMITH