Ongundu yimwe po ndjoka kayi uvitile ombili eningo lyomutumba ngoka mongeleka yoEvangelical Lutheran Church in the Republic of Namibia (ELCRN) oya popi kutya omutumba omuti-11 ngoka taku longekidhwa opo gu ningwe pokati komasiku 23 no 26 gaJuli mOkahandja kagu li pampango yongeleka ndjoka.
Omutumba ngoka otagu ka talulula omahogololo ngoka ga ningwa momasiku ga-4 gaFebruali nuumvo. Etokolo lyokutalulula omahogololo ngoka ga ningwa olya tseyithwa mocekula ndjoka ya pitithwa sha landula sho Omumbisofi Ernst //Gamxamûb a gandja ombili muMaalitsa omolwa okukutha iilyo yathika pu-8 uuthemba wawo wokuhogolola molwaashoka oya li ya tithwa mo moshinyanga moka mwa ningilwa omahogololo omanga omahogololo inaga ningwa. Pethimbo ndyoka okwa li a popi kutya iilyo mbyoka iipe ya hogololwa inayi vula okuganithilwa miilonga molwaashoka ope na yamwe po mboka inaya hogolola, na okwa popi kutya uupyakadhi mboka otawu ka kandulwa po owala momutumba ngoka tagu landulwa. Shoka osha e ta etopoko mongeleka. Aakalelipo yopaveta yiilyo iyali mbyoka ya li ya hogololwa Franzina !Nowases naJames Camm oya gandja omagwedhelepo opo mboka ya ganithilwe miilonga meendelelo gwo omutumba ngoka tagu pangelwa okuningwa gu kalekwe.
Okwa holoka omapopyo kutya iilyo iyali aandeakoni mboka ya dhengwamo momahogololo na oyeli aapopepi nomumbosofi nale Zephania Kameeta oya hala okulongitha etalululo lyomahogololo opo ya kuthe mo //Gamxamûb okuza melelo lyongeleka ye a pingenwe po komupevi omumbisofi Paul Hatani Kisting. Omapopyo gamwe oongoka kutya Kisting ota hwahwameke uukwamuhoko mongeleka molwaashoka aahogololwa aape, oye li yomuhoko gwaaDamara. Kisting okwa popi kutya kali po pethimbo kwa ningwa omahogololo ngoka ga ningwa muFebruali na okwa li koGermany ihe okwa popi kutya //Gamxamûb okwa ninga nawa sho a gandja ombili nokupula opo oshikumungu shoka shi kandulwepo. Kisting pamwe namushanga-ndjai Petrus Khariseb oshowo omusita Wilfred Diergaardt otaya gandja uusama komunashipundi ngoka a talele omahogololo ngoka sho apitika opo ku holoke omananathano ngoka.
Kisting okwa ekelehi woo omapopyo kutya ota hwahwameke uukwamuhoko nenge okwa hala okupingenapo Omumbisofi
//Gamxamûb. “Shoka hasho omutumba ngoka tagu ningilwa, ihe ogwa nuninwa okuhupitha ongeleka. Eindilo lyomumbisofi opo a ze koshipundi otali tu fala peni? Ngame ondi na ohokwe yokuninga omumbisofi? Okutala kontseyo yandje sho nda kala mongeleka muka kandi shi wete,” Kisting ta ti.
Catherine Sasman
Category: