Omusita ngoka kwa lopotwa a gandja etegelelo kokanona koskola momukunda Okelemba mOshitopolwa shaHangwena, okwa pewa elombwelo opo a fute oongombe hamano oshowo oshimaliwa shooN$9 000 muule womasiku 30, naakwashigwana oya tokola opo ongeleka ye yi hanagulwe po muule womasiku gaheyali.
Omusita omunamimvo 24, Gideon Shinehungi, omumwayinamati Elia oshowo omusita gumwe Lapindja Nghole, mboka ya kalela po ongeleka ndjoka yoJesus Christ Ministry (JCM), oya holoka komeho gompangu yopamuthigululwakalo mOnandova mOlyomakaya ya piti.
Mboka otaya tamanekelwa iipotha ngaashi okugandja omategeleleo kaanona yoskola oshowo okutula ongeleka yawo momukunda ngoka inaya pewa epitikilo. Aamwayinathana mboka yaali oya zimine kutya oya gandja omategelelo kaanona yoskola okuza momudhingoloko.
“Otandi itaala mpaka nena kutya onda yono koshipala shaKalunga nokukehe gumwe,” Shinehungi a lombwele ompangu mOlyomakaya. Omumwayinamati okwa pulwa opo a fute oongombe mbali kofamili yokakadhoka oshowo ooN$500 omolwa omutumba ngoka muule womasiku 30.
Otaku hokololwa kutya aanona ya thika puyatano ya pewa omategelelo kaanangeleka mboka mwakwatelwa omusita yemwene okutameka mo-2012.
Omusita gumwe Iiyambo Festus, ngoka naye kwa talikako kutya ogumwe gomwaakomeho yongeleka ina vula okuholoka koompangu dhoka ihe otaka holoka mompangu momasiku 13 gaAguste pamwe naaanangeleka yalwe mboka ya gandja omategelelo kaanona yoskola.
Elenga enene lyoshikandjo shaNandova, Elias Uaandja okwa popi kutya, Festus nakale iilopota kombelewa ye molwaashoka opolisi otayi kambadhala oku mu konga. Aakwashigwana momudhingoloko ngoka oya popi kutya ongeleka ndjoka oya hanagulapo omudhingoloko gwawo na inaye yi pumbwa we mokati kawo.
“Ngashiingeyi sho tatu popi ngiika oofamili ihadhi popi we omolwa ongeleka ndjoka. Aanona oya uvithwako kutya momagumbo omuna oondeemoni naavali otaya kambadhala okuya loga, ngashiingeyi aanona yetu otaye tu tuku na ihaya li we iikulya yetu,” gumwe gwomaavali ta ti.
Aasita mboka oya ndopa okuholola uumbangi kutya ongeleka yawo oya shangithwa nongongahangano yoongeleka moshilongo Council of Churches in Namibia (CCN).
“Oombapila dheni dha za kumwene gwomukunda nenge koCouncil of Churches in Namibia odhili peni? Otwa hala okumona uumbangi,” omukwashigwana gumwe a pula.
Festus Hangula, ngoka a kalela po mwene gwomukunda Okelemba, okwa popi kutya okwa li kwa ningwa omutumba gwaakwashigwana momasiku gaali gaJuli naantu yathika po87 oya hogolola yeli ompinge nongeleka noshikumungu shoka osha falwa kombelewa ya Uaandja.
Okwa popi kutya ongeleka ndjoka tango oya kala tayi longele popepi noskola ya Okeelmba Combined School, ihe oya patwa sho aavali yanyenyeta. Osha monika mo nee kutya ongeleka ndjoka ngashiingeyi otayi longele mehala lyaNghole. Hangula okwa popi kutya iizemo yaanona moskola oya gu pevi noonkondo konima nkene ongeleka ndjoka ye ya momudhingoloko ngoka..
“Aanona ohaya yi niikutu yawo yongeleka koskola nokonima yootundi ohaya hula mo omizalo dhawo dhoskola nokuzala iikutu yaawo yokongeleka na ohaya yi owala komagumbo mokati komausiku.”
Sho a ningilwa omapulaapulo, omunambelewa gwOpolisi,
Christina Fonsech okwa pandula etokolo ndyoka lya ningwa kelelo lyaNandova, na okwa popi kutya oongeleka odha nuninwa oku eta kumwe oofamili ihe haku dhi topola.
Ongeleka yo JCM otayi kwatelwa komeho kuVilho Paulus ngoka iiluka kutya oye ‘Jesus Kristus’ na okuli mOvenduka. Ongeleka ndjoka tayi longele mOkelemba oyimwe yomiitayi yongeleka ye. Ongeleka yaPaulus yomOvenduka oya li ya patwa kopolisi konima sho kwa monika kutya okwa gandja omategelelokaakwanegongalo ye ya thika pu-5.
KENYA KAMBOWE