Miese Tjituri, ngoka a kalela po omunamimvo 40, Jesaya Nikanor, oshiwike sha piti okwa popi mompangu yoPombanda kutya oDNA ndjoka ya adhika miipanyala nopuukiintu wanakusa Fiona Ann Holton oya tulwa po kpolisi.
Nikanor ota tamanekelwa oshipotha shekwatonkonga oshowo edhipago lyaHolton ngoka adhipagwa pokati komasiku 20 no-21 gaSepetemba mo-2008, konima sho iiteyele megumbo lyanakusa.
Omukalelipo gwopaveta okwa popi kutya opolisi oya kutha omate gomutamanekwa konima sho ya fekele kutya oye a longo oshimbuluma shoka .
Omukalelipo gwopaveta ngoka okwa pula ompangu opo yi mangulule omuyakulwa gwe.
Omukalelipo gwepangelo moshipotha shoka, Filistas Shikerete-Vendura okwa popi kutya pakutala komathano gehala mpoka pwa ningilwa oshimbuluma shoka otaga ulike kutya opwa li ekondjo enene pokati kanakusa nomuponokeli gwe.
Okwa popi kutya epangelo olya dhimbulula ombele ndjoka ya adhika oshinano oshishona okuza pehala lyoshiningwanima .
Omukalelipo gwepangelo okwa tsikile kutya omutamanekwa okwa lombwele Johannes Damaseb, ngoka e li gumwe gwomoombangi dhepangelo, nkene a longo ekwatonkonga ndyoka oshowo edhipago.
Okwa tsikile kutya iinima yi na ombinzi yanakusa oya adhika ya holekwa kohi yetalashe lyomutamanekwa.
Pamakonaakono goDNA ngoka ga ningwa oga ulike kutya ombinzi ndjoka ya adhika kombulukweya yomutamanekwa otayi tsu kumwe nombinzi yanakusa.
Okwa tsikile kutya ngoka ogo omatompelo ngoka ga imbi Nikanor a gandje ombulukweya ndjoka kopolisi molwaashoka okushi kutya ombinzi ndjoka yili ko oya nakusa, nopehalaokwa holoke ombuukweya ndjoka.
Shikerete-Vendura okwa tsu omuthindo kutya opolisi inayi longa po uulingilingi washa niizemo yoDNA oyi li ondjila.
Omupanguli Christie Liebenberg okwa undulile oshipotha shoka komasiku 25 gaJuli.
FRED GOEIEMAN